ԵՐԵՎԱՆ, 22 օգոստոսի — Sputnik. «Էքստրասենսների մենամարտ» շոուի եզրափակիչ փուլի մասնակիցներից մեկը` պայծառատես Զիրադին Ռզաևը շարունակում է մանրամասներ հայտնել Խաչատուրյան ընտանիքի մասին։ «Կոմսոմոլսկայա պրավդա» թերթի հետ հարցազրույցում էքստրասենսն ասել է, որ աղջիկները ստում են, երբ ասում են, թե հայրը սեռական ոտնձգություններ է կատարել նրանց նկատմամբ։
Նրա խոսքով`աղջիկներն այդ մեղադրանքներով փորձում են արդարացնել իրենց գործողությունները։
Սակայն էքստրասենսն ասել է` այն փաստը, որ Միխայիլ Խաչատուրյանն աղջիկներին իր սեփականությունն է համարել ու գրեթե չի թողել տնից դուրս գալ, ճիշտ է։
Միաժամանակ Ռզաևը կասկածել է, որ հանցագործությունը նախապես է ծրագրված եղել։
«Ծրագրված չի եղել։ Աղջիկներից մեկն առաջինն է հարվածել դանակով, մյուս երկուսը հետևել են նրա օրինակին», — ասել է էքստրասենսը։
Նա նաև վստահեցրել է, որ եթե տղամարդը ողջ մնար, ապա հաստատ կսպաներ բոլոր աղջիկներին։
«Այս տղամարդը գիշատիչի էր նման։ Սովոր էր, որ աշխարհն իր շուրջը պտտվի։ Ուրիշների կարծիքը նրան չէր հետաքրքրում», — ավելացրել է Զիրադին Ռզաևը։
Ավելի վաղ Ռզաևը եղել էր հանցագործության վայրում։ Ադրբեջանցին հասել էր շենքի այն հարկ, որտեղ սպանությունից հետո գտել էին հոր անշունչ մարմինը, ձեռքը տարել բնակարանի բռնակին, հենվել էր բնակարանի դռանը, սառնություն էր զգացել և պատմել ընտանիքի մասին։ «Այդ մարդու նեգատիվը շատ էր։ Նրան թուղթուգիր էին արել։ Կարծես հոգեկան հիվանդ լիներ։ Բնավորությամբ դիկտատոր էր, իր օրենքներն ուներ», — նշել էր էքստրասենսը։ «Նա շատ էր խանդում իր դուստրերին։ Նա, որպես կովկասցի տղամարդ, կարծում էր, որ աղջիկներն իր պատիվն են։ Նրանք մեծացել են առանց մոր և ճնշման տակ», — պատմել էր Զիրադինը։
Նշենք, որ այսօր Յարոսլավ Պակուլինը Մոսկվայում կայացած ճեպազրույցի ժամանակ ասել էր, որ քույրերը համաձայնել են ստի դետեկտորով ցուցմունք տալ։ Փաստաբանը համոզված է` քննիչները կկարողանան համոզվել, որ աղջիկները չեն ստում։
Աղմկահարույց սպանությունը տեղի է ունեցել հուլիսի 27-ին Մոսկվայի հյուսիս-արևելքում։ Երեք քույրերը հայտնել էին իրենց հորը` Միխայիլ Խաչատուրյանին սպանելու մասին։ Հարցաքննության ժամանակ քույրերը խոստովանել էին իրենց մեղքը և բացատրել, որ «իրենք վատ հարաբերություններ են ունեցել հոր հետ, քանի որ հայրը տարիներ շարունակ բարոյապես տանջել է նրանց»։ Մոսկվայի Օստանկինյան դատարանը օգոստոսի 2-ին կալանավորել է երեք քույրերին։
