ԵՐԵՎԱՆ, 22 օգոստոսի- Sputnik. Մեր բուհական համակարգը պետք է միտված լինի արտերկրից ուսանողներ բերելուն։ Այս մասին այսօր ֆեյսբուքյան ուղիղ հեռարձակման միջոցով ասաց ՀՀ վարչապետ Նիկոլ Փաշինյանը։
Նա նկատեց, որ մրցակցությունը միշտ բարձր է Երևանի բժշկական համալսարանում, որովհետև այս բուհը, ինչպես նախկինում, այսօր ևս դրսից ուսանողների մեծ հոսք ունի։ «Եթե աշխարհում Քեմբրիջի ու Հարվարդի համալսարաններ կան, չի նշանակում, որ այլ երկրներում լավ բուհեր չկան։ Օրինակ` իմ երեխաները սովորել են Տարտուի համալսարանում, որտեղ գները անգամ հայաստանյան բուհերից էժան են։
Համոզված եմ, որ եթե մեր բուհերը գին-որակ լավ հարաբերակցություն պահեն, դրսից ուսանողների հոսք կունենանք։ Ի դեպ, սա շատ կարևոր քայլ է տնտեսական քաղաքականության մեջ»,-ասաց Փաշինյանը։
Վարչապետի խոսքով` լավ կադրեր ապահովելու խնդիր ունենք։ Նա նկատում է, որ շատ է ասվում, որ մեր բուհական ոլորտը իրականությունից կտրված է, բայց չի ասվում խնդիրն ինչումն է։
«Օրինակ` մենք ունենք միջազգային հարաբերությունների ֆակուլտետներ, որոնք դիվանագետներ պիտի ստեղծեն, բայց շատ ավարտողներ` դիպլոմները ձեռքերին, չեն կարողանում աշխատել։ Ու մենք ունենք նաև ԱԳՆ-ին կից դիվանագիտական ակադեմիա, որը պրակտիկ գիտելիքներ է տալիս։ Ստացվում է, որ պետությունը նույն բանի համար 2 տեղ գումար է ծախսում։ Եվ այսպես գրեթե բոլոր մասնագիտությունների հարցում»,-ասում է Փաշինյանը։
Վարչապետի կարծիքով` եթե պրակտիկ ու լավ շրջանավարտներ կարողանում է պատրաստել ասենք` դիվանագիտական ակադեմիան, ուրեմն այն պետք իր ներուժով ներգրավվի համալսարանների ուսուցման գործընթաց։
