ԵՐԵՎԱՆ, 17 օգոստոսի — Sputnik. Հայաստանի գլխավոր դատախազությունը պատրաստվում է բողոքարկել Վերաքննիչ դատարանի` ՀՀ երկրորդ նախագահ Ռոբերտ Քոչարյանին կալանքից ազատելու որոշումը։ Այս մասին Sputnik Արմենիայի թղթակցին հայտնեց ՀՀ գլխավոր դատախազության տեղեկատվության և հասարակայնության հետ կապերի վարչության պետ Արևիկ Խաչատրյանը։
Նա ընդգծեց, որ դատարանի որոշումը ստացել է ինչպես մեղադրող, այնպես էլ պաշտպանող կողմը։
«Գլխավոր դատախազությունն այսօր ստացել է Վերաքննիչ դատարանի որոշումը և մտադիր է բողոքարկել այն», —հայտնեց նա։
Ավելի վաղ Քոչարյանի պաշտպան Հայկ Ալումյանը նույնպես հայտնել էր, որ իրենք ևս ստացել են դատարանի որոշումը և մանրակրկիտ ուսումնասիրում են այն։ Նախկին նախագահի պաշտպանները նույնպես մտադիր են բողոքարկել որոշումը, քանի որ կարծում են` դրանում արտացոլված չեն երկու պահ, որոնք դատարան էին ներկայացվել Քոչարյանի անձեռնմխելիության հիմնավորման հետ մեկտեղ։
Հիշեցնենք, որ օգոստոսի 13-ին Ռոբերտ Քոչարյանին ազատ էին արձակել Վերաքննիչ դատարանի որոշմամբ։ Սակայն պետական մեղադրանքը դեռ հանված չէ և բողոքարկվելու է Վճռաբեկ դատարանում։
Քոչարյանը դատարանի որոշմամբ կալանավորել էր հուլիսի 28-ին։ Նրան մեղադրում են 2008 թվականին սահմանադրական կարգը տապալելու համար։ Խոսքը 2008 թվականի մարտի 1-2-ի դեպքերի մասին է։ Այն ժամանակ նախագահական ընտրություններից հետո ՀՀ առաջին նախագահ Լևոն Տեր-Պետրոսյանի համախոհները հրաժարվել էին ընդունել ԿԸՀ-ի տվյալներն ու դուրս էին եկել փողոց։ Ցուցարարների դեմ մարտական զենք էր կիրառվել, 10 մարդ մահացել էր։
