Ամփոփելով նոր կառավարության 100 օրը` Sputnik Արմենիայի եթերում ասաց ՀՀԿ-ի մամուլի քարտուղար, ՀՀ ԱԺ փոխխոսնակ Էդուարդ Շարմազանովը։
«Թե՛ ներքին, թե ՛արտաքին քաղաքականությունում հիմնականում Փաշինյանի վարչակարգը ցույց է տվել, թե ինչպես պետք է փչացնել հարաբերությունները, թե ինչպես պետք չէ կառավարել։
Անցած 3 նախագահների կառավարման շրջանում մեր հստակ արտաքին քաղաքական ուղղվածությունը եղել է դաշնակցային հարաբերություններ Ռուսաստանի հետ, հիմա հայ–ռուսական հարաբերություններին բավականին լուրջ փորձություն է սպասվում։ Այս 100 օրվա ընթացքում նոր իշխանությունը մունաթ է եկել Եվրոպայի վրա, ասել` մենք ավելի շատ փող էինք սպասում, նաև լուրջ տարաձայնություններ ստեղծել հայ–ռուսական հարաբերություններում։
Այսօրվա ղեկավարն իր առաջին ասուլիսում հայտարարում է, որ Հայաստանը Ղարաբաղյան հակամարտության կողմ է, ինչը տարիներ շարունակ ասել է Ադրբեջանը` տարբեր հարթակներում»,–ասում է Շարմազանովը։
Նա նշում է նաև, որ, իհարկե, կարևոր են կոռուպցիայի դեմ պայքարն ու արդարադատության հաստատումը, բայց չի կարելի քաղաքական վրեժխնդրության քողի տակ պայքարել կոռուպցիայի դեմ։
«Նաև կա քաղաքական տեռոր այլախոհության նկատմամբ։ Ի՞նչ է նշանակում հասարակությունը բաժանել հեղափոխականների ու հակահեղափոխականների»,–հարց է բարձրացնում Շարմազանովը։
