ԵՐԵՎԱՆ, 16 օգոստոսի — Sputnik. ՀՀ վարչապետ Նիկոլ Փաշինյանը մտածում է օգոստոսի 17-ին նախատեսված հանրահավաքից առաջ երթ կազմակերպել։ Այս մասին նա գրել է ֆեյսբուքյան իր էջում։
«Մտածում եմ վաղը Հանրապետության հրապարակ գալ երթով՝ Երեւանի մի որեւէ թաղամասից. այնպես ինչպես անում էինք հեղափոխության օրերին: Ի՞նչ կարծիքի եք»,- գրել է նա:
Ոմանք գրել են, որ Փաշինյանի ասածն իրենց համար օրենք է, ոմանք էլ նախազգուշացրել են, որ դա վտանգավոր նախաձեռնություն է։
ՀՀ վարչապետ Նիկոլ Փաշինյանն ավելի վաղ ֆեյսբուքյան իր էջում հայտարարել էր, որ օգոստոսի 17-ին հանրահավաք է անցկացնելու։
«Լրանում է իմ վարչապետ ընտրվելու 100 օրը։ Առաջարկում եմ օգոստոսի 17-ին, ժամը 18։30-ին մեծ հանրահավաք հրավիրենք։ Չգիտեմ` դուք ոնց, ես ձեզ շատ եմ կարոտել։ Ուզում եմ, որ մենք նորից շփվելու հնարավորություն ունենանք։ Կարծում եմ` պետք է կարևոր խոսակցություն ունենալ, թե Հայաստանի Հանրապետությունում ինչ է տեղի ունեցել վերջին 100 օրվա ընթացքում և ինչ է տեղի ունենալու»,-ասաց Փաշինյանը։
Նա խոստացել էր հանրահավաքի ընթացքում ներկայացնել, թե ինչ քայլեր է ձեռնարկում ՀՀ կառավարությունը Հայաստանում թռիչքաձև զարգացում ապահովելու համար։ Ինչ հնարավորություններ և ինչ մարտահրավերներ կան և ինչպես են կառավարելու այդ մարտահրավերները։
