ԵՐԵՎԱՆ, 15 օգոստոսի — Sputnik. «Ռոսգոսստրախ» ապահովագրական ընկերությունը հայց է ներկայացրել նախկին գլխավոր տնօրեն Դմիտրի Մարկարովի դեմ «Ռոսգոսստրախ Արմենիան» ցածր գնով վաճառելու համար։
Այն մասին, որ Մոսկվայի շրջանի միջնորդ դատարանը 241,8 միլիոն ռուբլու (3,6 միլիոն դոլար) հայց է ներկայացվել Մարկարովի դեմ, տեղեկանում ենք Ռուսաստանի միջնորդական գործերի քարտարանից։ Վեճում երրորդ կողմը Ռուսաստանի բանկն է։
Ընկերության հաղորդագրությունում նշվում է, որ նրան պատկանող «ՌԳՍ Արմենիա» ընկերության բաժնետոմսերը վաճառվել են ցածր գնով։
«Ռոսգոսստրախում» կարծում են, որ անհայտ շահառուներով օֆշորային կիպրոսական ընկերությունը չնչին գնով դարձել է Հայաստանի առաջատար ապահովագրողի սեփականատերը, որն, ի տարբերություն մայր ընկերության, վնասներ չի կրել։
Մարկարովը ԶԼՄ–ներին տված մեկնաբանություններում հայտարարել է, որ անմիջականորեն կապ չի ունեցել գործարքի հետ։
Դմիտրի Մարկարովը ապահովագրողի գլխավոր տնօրենն էր 2013.թ–ից, նա պաշտոնը լքել է 2017թ–ի աշնանը։ «ՖԿ Օտկիտիե» բանկն 2017–ի օգոստոսի վերջից հսկողություն է ունեցել «Ռոսգոսստրախի» վրա։ Մինչ այդ ընկերության շահառուներ են դարձել Դանիլ և Սերգեյ Խաչատուրով եղբայրները։
Նշենք, որ սկանդալ է ծագել նաև «Ռոսգոսստրախ» ընկերությունների խմբի նախկին սեփականատեր Դանիլ Խաչատուրովի հետ։ Վերջինիս կասկածում են 26,5 միլիարդ ռուբլի (մոտ 400 միլիոն դոլար)ընկերությունից արտասահման տանելու մեջ։
«Ռոսգոսստրախ» խմբի նախկին փոխնախագահ Սերգեյ Խաչատուրովը` Դանիլի եղբայրը, ապրիլին ձերբակալվել է մեկ միլիարդ ռուբլի հափշտակելու մեղադրանքով։
