Վաղվան սպասելիս. «Սանիթեքը» պատրաստ է վճարել տուգանքը, «Ելք»–ն անակնկալ է խոստանում

ԵՐԵՎԱՆ, 9 օգոստոսի — Sputnik. «Սանիթեք» ընկերությունը հարգանքով է վերաբերվում 12 մլն դրամի (մոտ 25 հազար դոլար) նրան տուգանելու Երևանի քաղաքապետարանի որոշմանը, Sputnik  Արմենիայի թղթակցին հայտնել են ընկերությունից։

Ավելին, բոլոր սպասումներին հակառակ, ընկերությունը հաշվի կառնի քաղաքապետարանի նկատողությունը, և որոշումը չի վիճարկի։ Սա հատկապես տարօրինակ է, քանի որ քաղաքապետարանի որոշման հրապարակումից առաջ, «Սանիթեքը» քաղաքային իշխանություններին «դժգոհությունների» ցանկ էր ներկայացրել` հիշեցնելով աղբանոցների ողբալի վիճակի, սարսափելի փողոցների, աղբատար խողովակների հետ կապված խնդիրների և սուպերմարկետների աղբի մեծ ծավալների մասին։

Բնականաբար քաղաքապետարանը իր մեղքի բաժնի մասին չի մտածել և ինչպես քաղաքացիների, այնպես էլ «Ելք» խմբակցության համար ամենասպասելի որոշումն է կայացրել։ Հենց «Ելք»–ն է ընկերությանը վերջնագիր ներկայացրել. կամ բոլոր խնդիրները լուծվում են մեկ շաբաթ ժամկետում, կամ սկսվում է պայմանագրի խզման գործընթաց։ Այժմ էլ այդ նույն խմբակցության պատգամավոր Անի Սամսոնյանն է Facebook–ի իր էջում հիշեցրել է, որ ժամկետն ավարտվում է օգոստոսի 9-ին, և եթե պահանջը չկատարվի, ապա ընկերությանն անակնկալ է սպասում։

Միևնույն ժամանակ, քաղաքացիները շարունակում են ահազանգել աղբի կուտակումների և աղբատար խողովակներից եկող սարսափելի հոտի մասին։ «Կենտրոն» վարչական շրջանի բնակչուհի Արաքս Մաթևոսյանը նշեց, որ ընկերության աղբահավաք մեքենան երկար ժամանակ նրանց բակ չի եկել, ինչի պատճառով աղբամաններում կուտակված աղբը սկսել է փտել։ Բակի բնակիչները ստիպված են ինքնուրույն իրականացնել աղբահանությունը և փորձում են աղբը թափել այն աղբամանների մեջ, որոնք երևացող տեղերում են գտնվում` հույս ունենալով, որ գոնե այնտեղից այն կհեռացվի։

«Սանիթեք» ընկերությունը` Բեյրութում 2010 թվականին հիմնադրված Sanitek International Group միջազգային ընկերության մասնաճյուղն է։ Երևանի վարչական շրջաններից մեկում այն սկսել է գործել 2014 թվականի դեկտեմբերից։ 2016 թվականից ընկերությունը սպասարկում է Երևանի բոլոր վարչական շրջանները։