ԵՐԵՎԱՆ, 9 օգոստոսի — Sputnik. Բնապահպանության նախարար Էրիկ Գրիգորյանը ստորագրել է 2018-2019 որսաշրջանի վերաբերյալ հրաման: Այս մասին տեղեկացնում են նախարարի մամուլի ծառայությունից:
Հրամանով սահմանվում են որսի համար նախատեսվող 2018-2019 թվականների օգտագործման թույլատրելի չափաքանակները և որսի ժամկետները:
Այս տարի առաջին անգամ որսաշրջանի ընթացքում չի թույլատրվել կաթնասունների որս։ Հրամանին զուգահեռ նաև պաշտոնական գրություն է ուղարկվել Բնապահպանության և ընդերքի տեսչական մարմնի ղեկավարին՝ որսաշրջանի ընթացքում կենսառեսուրսների օգտագործման պայմանագրերից բխող իրավունքների և պարտականությունների իրավական գործընթացի վերահսկողությունն ուժեղացնելու առաջարկով։
Նախարարության այս որոշման հիմքում ՀՀ Գիտությունների ազգային ակադեմիայի Կենդանաբանության և հիդրոէկոլոգիայի գիտական կենտրոնի տնօրենի 2018 թվականի հուլիսի 20-ի N2459-152 գրությամբ ներկայացված առաջարկությունների փաթեթն է:
