ԵՐԵՎԱՆ, 9 oգոստոսի — Sputnik. Ստեփանավանի սոցիալական ապահովության տարածքային գործակալությունը կեղծ նպաստառուների ցուցակներով վերջին 5 տարվա ընթացքում պետությունից հափշտակել է 587.160.000 մլն դրամ։ Այս բացահայտումն արվել է Քննչական կոմիտեում քննվող քրեական գործի նախաքննության ընթացքում։
Պարզվել է նաև, որ սոցապ գործակալության աշխատակիցներն այս հարցում համագործակցել են նաև «Հայփոստի» փոստային բաժանմունքների աշխատակիցների հետ:
Արդյունքում, քրեական գործում ներգրավված 21 անձանցից 15–ը` «հայփոստի» աշխատակիցներ են, 6-ը` սոցապ ծառայության։
Մեղադրյալներից 19-ի նկատմամբ որպես խափանման միջոց է ընտրվել ստորագրություն չհեռանալու մասին, 2-ի նկատմամբ` կալանավորումը և հայտարարվել է հետախուզում: Նրանց գույքի նկատմամբ արգելանք է դրվել՝ պետությանը պատճառված վնասի հատուցումն ապահովելու նպատակով։
Հետախուզվողներից մեկը Ստեփանավանի սոցապ գործակալության պետ Ա.Ղարաքեշիշյանը:
Քննչական կոմիտեն հայտնում է նաև, որ նախաքննության ընթացքում առ այսօր մեղադրյալների կողմից վերականգնվել է հափշտակված 587.160.000 դրամից 27.740.000 –ը։
