ԵՐԵՎԱՆ, 9 օգոստոսի — Sputnik. Ռոբերտ Քոչարյանը պետք է մնա կալանքի մեջ: Այսօր լրագրողների հետ զրույցում հայտարարեց ՀՔԾ պետ Սասուն Խաչատրյանը:
«Մենք մեր միջնորդության մեջ նշել ենք, ես էլ բազմիցս նշել եմ, որ Ռոբերտ Քոչարյանն ազատության մեջ լինելով, հնարավորություն ունի ազդելու քրեական դատավարությանը մասնակցող անձանց վրա, թաքցնելու ապացույցները, այլ ձևով խոչընդոտելու նախաքննությանը»,- ասաց Խաչատրյանը:
Իսկ թե որքանով է նախկին նախագահը խոչընդոտել գործի բացահայտմանը նախորդ 10 տարիների ընթացքում, ՀՔԾ պետը հրաժարվեց պատասխանել` ասելով, որ չի տիրապետում նման տեղեկատվության:
Հիշեցնենք, որ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը 2008 թվականի մարտի 1-ից 2-ն ընկած ժամանակահատվածում Երևանում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռքբերված ապացույցների բավարար համակցության հիման վրա 2018 թվականի հուլիսի 26-ին ՀՀ պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Հիշեցնենք նաև, որ հուլիսի 31–ին Հայաստանի Հանրապետական կուսակցությունը ստորագրահավաք է սկսել Ռոբերտ Քոչարյանի խափանման միջոցը փոխելու պահանջով: Երաշխավորագրի տակ ստորագրել էր նաև ԱԺ նախագահ Արա Բաբլոյանը։
Ռոբերտ Քոչարյանի խափանման միջոցը փոխելու երաշխավորագրին միացել էին նաև պատգամավորներ ՀՅԴ և «Ծառուկյան» խմբակցությունից։ Նույն խնդրով ՀՀ գլխավոր դատախազությանը երեկ` օգոստոսի 7–ին դիմել էին նաև Արցախի ԱԺ պատգամավորները։
Օգոստոսի 8–ին, ՀՀ գլխավոր դատախազությունը մերժել էր ՀՀ ԱԺ 45 պատգամավորի միջնորդությունը ՀՀ 2–րդ նախագահի խափանման միջոցը փոխելու վերաբերյալ։
