ԵՐԵՎԱՆ, 7 օգոստոս — Sputnik. «Հայանտառ» ՊՈԱԿ «Ստեփանավանի անտառտնտեսության» մասնաճյուղում քննչական կոմիտեի մասնագիտական խումբը հայտնաբերել է ապօրինի հատված 1301 տարբեր տեսակի և տրամագծերի ծառերի կոճղեր:
Պետությանը պատճառված վնասը գնահատվել է 88 773 750 դրամ:
Հայտնում է ՀՀ քննչական կոմիտեն։
«Հայանտառ» ՊՈԱԿ-ի մի շարք աշխատակիցների կողմից առերևույթ պաշտոնեական դիրքը չարաշահելու և պաշտոնեական կեղծիքներ կատարելու դեպքերով հարուցվել է քրեական գործ, որը միացվել է նախկինում նույն մեղադրանքով հարուցված քրեական գործին։
Հիշեցնենք, «Հայանտառ» ՊՈԱԿ-ի տարբեր մասնաճյուղերում ապօրինի ծառահատումների, ոլորտի պատասխանատու պաշտոնատար անձանց կողմից այդ հանցագործությունների թողտվության, հովանավորչության, սիստեմատիկ կաշառք ստանալու մեղադրանքներով նախկինում արդեն հարուցվել էր 4 քրեական գործեր, որոնք ևս միացվել էին մեկ վարույթում:
Դրանցով որպես մեղադրյալ է ներգրավվել 13 անձ, որոնց թվում` բնապահպանության նախարարության բնապահպանական պետական տեսչության պետի տեղակալը, նույն տեսչության բույսերի կենսաբազմազանության բաժնի պետի տեղակալը, ավագ պետական տեսուչը, որոնց նկատմամբ խափանման միջոց է ընտրվել կալանավորումը։
Իսկ «Սյունիքի անտառտնտեսության» անտառապետը, «Արծվաբերդի անտառտնտեսության» 3 անտառապետեր գրավով և ստորագրությամբ ազատ են արձակվել` մինչ նախաքննության ավարտը։
Նախկինում կատարված բացահայտումներով պետության պատճառված վնասը հաշվարկվել է շուրջ 1.5 մլրդ դրամ.
«Սյունիքի անտառտնտեսությունում»` 9 միլիոն 771 750, «Նոյեմբերյանի անտառտնտեսությունում»` 12 միլիոն 490 500, «Եղեգնուտի անտառտնտեսությունում»՝ 99 միլիոն 845 583, «Ստեփանավանի անտառտնտեսությունում»`97 միլիոն 174 500, «Արծվաբերդի անտառտնտեսությունում»` 428 միլիոն 667 000, «Դսեղի անտառտնտեսությունում»` 637 միլիոն 959 000, «Իջևանի անտառտնտեսությունում»` 128 միլիոն 238 000 և «Սևքարի անտառտնտեսությունում»` 11 միլիոն 378 250 ՀՀ դրամ:
