ԵՐԵՎԱՆ, 7 օգոստոսի — Sputnik. Հատուկ քննչական ծառայությունը բացահայտել է պետության գումարները յուրացրած հերթական պաշտոնյային։ Այս անգամ կասկածյալը ՀՀ ոստիկանության Պետական պահպանության գլխավոր վարչության Քանաքեռ-Զեյթունի բաժնի աշխատակից է։
Նրա կոնկրետ պաշտոնը Հատուկ քննչական ծառայության տարածած հաղորդագրության մեջ չի հիշատակվում։
Նշվում է միայն, որ նա 2015-2018թթ–ին նույն բաժնի հաշվապահի միջոցով յուրացրել է իր և իր 11 ծառայողների քարտային հաշվեհամարներին ավել վճարված գումարները։
Բաժնի մի խումբ աշխատակիցների համար անհիմն հաշվարկել ու հաշվեհամարներին է փոխանցել սոցիալական փաթեթի գումարներ։ Բացի այդ՝ անհիմն գումարներ են փոխանցվել տվյալ բաժնում չաշխատող ու պահպանություն չիրականացրած անձանց քարտային հաշվեհամարներին։
Այս ամենի արդյունքում բարձրաստիճան ոստիկանը պետական բյուջեից հափշտակել ու յուրացրել է 128 646 911 դրամ։
Բացահայտված փաստերով ՀՔԾ–ում հարուցվել է քրեական գործ` ոստիկանության պաշտոնատար անձի կողմից առանձնապես խոշոր չափերով յուրացում կատարելու հիմքով։
Կատարվում է նախաքննություն։
