ԵՐԵՎԱՆ, 6 օգոստոսի — Sputnik, Լաուրա Սարգսյան. «Քայլ դեպի տուն» ծրագրի մասնակից Լարիսա Կարլսյանը երջանիկ է, որ իրեն է բախտ վիճակվել հյուընկալվել ՀՀ վարչապետի տանը։
Ավելի վաղ ՀՀ սփյուռքի նախարարությունը բացահայտել էր այն բախտավորի մասնակցի անունը, որն ապրելու է Փաշինյանի ընտանիքում։ Անունը վիճակահանության ժամանակ հանել է վարչապետի դուստրը` Շուշանը։ Լարիսան ծրագրի այլ մասնակիցների հետ Հայաստան կգա օգոստոսի 9–ին ու կապրի վարչապետի ընտանիքում մինչ օգոստոսի 24–ը։
Լարիսան 17 տարեկան է, ծնվել է Սամցխե–Ջավախքի Նինոծմինդա քաղաքում։ Այս տարի նա ավարտել է դպրոցն ու միանգամից ընդունվել է Թբիլիսիի Իլյա Չավչավաձեի անվան համալսարան` Վրաստանի խոշոր ազգային փոքրամասնությունների ներկայացուցիչների համար նախատեսված 1+4 ծրագրի շրջանակում։ Հույս ունի մագիստրատուրա սովորել Հայաստանում։ Աղջիկն արդեն ավելի քան տասը տարի է զբաղվում է ազգային պարերով ու երաժշտական կրթություն ունի։
Լարիսան մինչ այժմ չի հավատում, որ այս ամենն իրականություն է։ «Թավշյա հեղափոխության» օրերին նա ուղիղ եթերով, լրատվամիջոցներով ուշադիր հետևում էր Հայաստանի իրադարձություններին։ Աղջիկը շատ էր ուզում հանդիպել Փաշինյանին ու նրա հետ սելֆի անել։ Սակայն նրան չհաջողվեց հեղափոխության օրերին Հայաստան գալ։ Նա չկարողացավ տեսնել Փաշինյանին նաև նրա` Սամցխե–Ջավախք կատարած այցի ժամանակ։
Հիմա Լարիսան հավատում է, որ երազանքներն իրականանում են, ու նա կարող է անել բաղձալի սելֆին։
«Ուզում եմ խնդրել Փաշինյանին աջակցել մեր տարածաշրջանի հայալեզու դպրոցներին», – ասաց Լարիսան։
Արդեն մի քանի տարի է Սամցխե–Ջավախքի հայկական դպրոցները մեծ խնդրի առաջ են կանգնած. դասագրքերը պակասություն են անում։ Չի թույլատրվում նաև առանց Վրաստանի կրթության նախարարության իմացության Հայաստանից սեփական միջոցներով դասագրքեր գնել։
«Գեղարվեստական գրականություն էլ է պակասություն անում։ Ուզում ենք ժամանակակից գրողների գրքերն ընթերցել, սակայն այդպիսի հնարավորություն չունենք», –ասաց աղջիկը։
Բացի այդ, Սամցխե–Ջավախքի հայկական դպրոցներում աշակերտները հայ ժողովրդի պատմություն չեն անցնում։
«Դա շատ ցավոտ հարց է։ Շատ կուզեի, որ դպրոցներում մեր պատմական հայրենիքի պատմությունը դասավանդեին», – ասաց Լարիսան։
Հիշեցնենք`, «Քայլ դեպի տուն» ծրագրի 13–ից 21 տարեկան մասնակիցները ներկայացնում են աշխարհասփյուռ հայությանը։ Ծրագիրը երկու շաբաթ է տևում ու մեկնարկում է օգոստոսի 10–ին։
