ԵՐԵՎԱՆ, 3 օգոստոսի — Sputnik. Արդեն հայտնի է «Քայլ դեպի տուն» ծրագրի այն մասնակցի անունը, ում կհյուրընկալի ՀՀ վարչապետ Նիկոլ Փաշինյանի ընտանիքը։
Ինչպես տեղեկացնում են ՀՀ սփյուռքի նախարարության մամուլի և հասարակայնության հետ կապերի վարչությունից, վիճակահանության շնորհիվ պարզ է դարձել, որ վրացահայ 18-ամյա Լարիսա Ղարսլյանը 10 օր շարունակ կապրի Նիկոլ Փաշինյանի և նրա ընտանիքի հետ:
Այսօր`օգոստոսի 3-ին, սփյուռքի նախարարությունում նախարարի տեղակալ Դավիթ Սարգսյանի օգնությամբ վարչապետ Նիկոլ Փաշինյանի դուստրը՝ Շուշանը, ծրագրի մասնակիցների անունների գրառումներով տուփից պատահականության սկզբունքով ընտրել է վրացահայ 18-ամյա Լարիսա Ղարսլյանին:
«Մենք սիրով սպասում ենք Լարիսային մեր տանը և հուսով ենք՝ լավ ժամանակ կանցկացնենք»,-նշել է Շուշան Փաշինյանը:
Ավելի վաղ ֆեյսբուքյան ուղիղ միացմամբ սփյուռքի նախարար Մխիթար Հայրապետյանը և ՀՀ վարչապետի տիկին Աննա Հակոբյանը հայտարարել էին, որ վարչապետի ընտանիքը կհյուրընկալի «Քայլ դեպի տուն» ծրագրի մասնակիցներից մեկին: Սփյուռքի նախարարը հորդորել էր հայաստանցիներին հետևել Աննա Հակոբյանի օրինակին, որովհետև երեխաներին ընտանիքներում տեղավորելու խնդիր կա։
