ԵՐԵՎԱՆ, 26 հուլիսի — Sputnik. Նյու Յորքի շքեղ ռեստորաններից մեկը` Petrossian–ը, պատկանում է խավիարային մագնատ Արմեն Պետրոսյանին։
Այն գտնվում է Կոլումբոսի հրապարակի կողմից Կենտրոնական զբոսայգու մուտքի մոտ` 58–րդ փողոցի և 7–րդ ավենյուի անկյունում, Alwyn Court պատմական շենքում, գրում է «Տողերից դուրս» պարբերականը։
Ռեստորանը մասնագիտացած է ֆրանսիական խոհանոցի վրա, այնտեղ շեշտը դնելում են ծովամթերքի վրա` ոստրե, ապխտած թառափ, լոբստեր, կարմիր ծովախեցգետին, սարդինա և սաղմոն։
«Ռեստորանում մատուցում են նաև ֆուա գրա, բադի ապխտած միս և հայտնի ֆրանսիական պանիրներ։ Հիմնական ճաշատեսակը, իհարկե, սև խավիարն է։ Այստեղ սև խավիարն ամեն ինչի մեջ է` ձմերուկով, պանրով և սև խավիարով աղցանի, լոբստերով և սև խավիարով ռիզոտոյի։ Այստեղ մարտինիի հետ մատուցում են սև խավիար, իսկ շոկոլադը մատուցում են սև խավիարի ամանով` ձկնկիթի հատիկների տեսքով», – ասվում է հոդվածում։
Ռեստորանում կա 16 տեսակի խավիար։ Հեղինակն ընդգծում է, որ այդ ամենը զարմանալի չէ, քանի որ հենց Պետրոսյաններն են ֆրանսիացիներին, այնուհետև ամբողջ Արևմտյան Եվրոպային և ԱՄՆ–ին ծանոթացրել սև խավիարի հետ։
Ամեն ինչ սկսվել է նրանից, որ Արմենի հայրը` Միքայել Պետրոսյանը, եղբոր` Մելքումի հետ միասին 1920թ–ին Ռուսաստանից արտագաղթել է Ֆրանսիա։ Միքայելն առաջին մարդն է եղել, որը սկսել է Ֆրանսիայում ռուսական խավիար վաճառել։
«Մեկ տարի անց, երբ Պետրոսյան եղբայրները հաստատվել են Փարիզում, ծանոթացել են Սեզար Ռիտցի` Փարիզի հայտնի Ritz հյուրանոցի սեփականատիրոջ հետ։ Սկզբից Սեզարը հրաժարվել է մասնակցել խավիարի բիզնեսին և նույնիսկ եղբայրներին է համոզել չզբաղվել դրանով», – պարբերականին պատմել է Արմեն Պետրոսյանը։
Ռիտցն այդ գաղափարն անհեռանկարային է համարել` խավիարը համարելով չափազանց էկզոտիկ մթերք։ Ավելի ուշ նա խոստացել է օգնելու համար մի քիչ ապրանք վերցնել և իրացնել։ Այդ պահը շրջադարձային է եղել։
Ընդլայնել բիզնեսը և մենատեր դառնալ Պետրոսյաններին օգնել է «Լազար Մաիլով և որդիներ» ընկերության տերը` Էլի Մաիլովը։
Միքայելն ամուսնացել է Իրինայի` Էլիի դստեր հետ։ Բիզնեսը 1980թ–ին վերածվել է կորպորացիայի։
«Արդեն Միքայելի որդին` Արմեն Պետրոսյանը, որն ավարտել է Սորբոնի համալսարանի պատմական ֆակուլտետը և 1971թ–ին սկսել իր կարիերան հոր կորպորացիայում ` որպես սևագործ բանվոր, Փարիզի մոտ կառուցել է ծովամթերքի իր առաջին սեփական գործարանը», – գրում է պարբերականը։
Արմենը հիշում է, որ հոր ընկերությունում անցել է բոլոր աստիճանները. եղել է հավաքարար, առաքիչ վարորդ, վաճառող։ Հիմա սև խավիարի վաճառքի բիզնեսը կազմում է ընկերության շրջանառության 35 տոկոսը։ Պետրոսյանը ձկնկիթի շուկայի արքան է, նա վերահսկում է սև խավիարի համաշխարհային վաճառքի 25 տոկոսը, խավիարի խոշորագույն մատակարարն է Ֆրանսիա և ԱՄՆ։
Վերջերս Սակրամենտոյում` Կալիֆոռնիա նահանգի մայրաքաղաքում, Արմեն Պետրոսյանը բացել է թառափի բուծման և սև խավիարի արտադրության հսկայական գործարան։ Այդտեղից նա խավիար է առաքում Միացյալ Նահանգների իր բոլոր ռեստորաններ ու խանութներ։ Արմեն Պետրոսյանը Նյու Յորքից բացի ռեստորաններ է բացել Հոլիվուդում և Լաս Վեգասում, ընդ որում այստեղի ռեստորանը գտնվում է մեկ այլ հայի` միլիարդատեր Քըրք Քըրքորյանին պատկանող Bellagio խաղատանը։
Այժմ ընկերությունը ղեկավարում է Արմենի որդին` Ալեքսանդր Պետրոսյանը։
