ԵՐԵՎԱՆ, 28 հուլիսի — Sputnik. Այսօր, հուլիսի 28-ին Մոնթե Մելքոնյանի անվան ռազմամարզական վարժարանում տեղի է ունեցել «Ընկերակցության մարտիկ» միջազգային մրցույթի բացման հանդիսավոր արարողությունը:
4-րդ «Միջազգային բանակային խաղերի» շրջանակում Հայաստանն առաջին անգամ է հյուրընկալում այս մրցաշարը:
Դրա մասնակիցներին այսօր ողջունել և հաղթանակներ է մաղթել ՀՀ պաշտպանության նախարարի տեղակալ Գաբրիել Բալայանը:
«Վստահ եմ, որ խաղերի ընթացքում մասնակիցները կցուցադրեն իրենց ռազմական հմտություններն ու պրոֆեսիոնալիզմը»,- ասաց Բալայանը:
Մրցույթը կանցկացվի Երևանում, Դիլիջանում և Իջևանում: Միջազգային մրցույթին մասնակցում են Հայաստանի, Բելառուսի, Իրանի, Հունաստանի, Ղազախստանի, Ռուսաստանի և Ուզբեկստանի զինված ուժերի ներկայացուցիչները:
Պաշտպանության փոխնախարարի դիտարկմամբ, Հայաստանն այս մրցույթի հյուրընկալությամբ վերածվում է յուրօրինակ տարածաշրջանային կենտրոնի։
Մասնակից պետությունների թիմերը ուժերը կչափեն ռազմամարզական «Ատլետ», ռազմամասնագիտական «Պրոֆեսիոնալ», կրակային պատրաստության «Դիպուկահար», գրական-գեղարվեստական և պարային-երաժշտական «Տեր և Տիկին», ռազմական պատմության գիտելիքների ստուգման «Էրուդիտ» մրցաձևերում:
