ԵՐԵՎԱՆ, 27 հուլիսի — Sputnik. Ավտոմեքենաների տեխնիկական զննությամբ զբաղվող մի շարք ընկերությունների թույլ տված առերևույթ չարաշահումների բոլոր հանգամանքները պարզելու, պետությանը պատճառված իրական վնասի ծավալները հստակեցնելու աշխատանքները շարունակվում են։
ՀՀ քննչական կոմիտեից տեղեկացնում են, որ հուլիսի 26-27-ին վերականգնվել է 25.600.000 ՀՀ դրամ: Մասնավորապես՝ «Տրանս Սիստեմ» ՍՊԸ-ի տնօրենը վարույթ իրականացնող մարմնին է ներկայացրել ՀՀ ՔԿ դեպոզիտ հաշվին ևս 10 մլն ՀՀ դրամ, «Ավտոտեխստուգատես ԷՄ ԷԼ» ՍՊ ընկերության տնօրինությունը՝ 2մլն ՀՀ դրամ, «Աթո» ՍՊԸ-ի տնօրենը՝ 2 մլն դրամ, «Նվարդ Ավետիսյան» ԱՁ-ն՝ 5. 200.000 դրամ, «Արա և Այծեմնիկ» ԲԲԸ-ն՝ 6.400.000 դրամ վճարելու մասին անդորրագրերը:
Այսպիսով՝ հուլիսի 27-ի դրությամբ՝ միայն նշված ոլորտում արձանագրված չարաշահումների դեպքերի առթիվ քննվող քրեական գործերով ավտոմեքենաների տեխնիկական զննությամբ զբաղվող մի շարք ընկերությունների կողմից, որպես պատճառված վնասի մասնակի փոխհատուցում, վճարվել է 81.300.000 ՀՀ դրամ։
Քրեական գործերով նախաքննությունը շարունակվում է:
