ԵՐԵՎԱՆ, 26 հուլիսի — Sputnik. «Курников» թռչնակոմբինատի և դրա արտադրանքը ներմուծողների դեմ մեղադրանքներն անարդար են և մերկապարանոց։ Այդ մասին Sputnik Արմենիայի հետ զրույցում հայտարարեց ընկերության հայկական ներկայացուցչության տնօրեն Էդմոն Գիգոլյանը։
Ավելի վաղ Sputnik Արմենիան տեղեկություններ էր հրապարակել ներկրվող թռչնամսի նմուշների ցածր որակի մասին։ Գիգոլյանի կարծիքով` այդ տեղեկությունները չեն համապատասխանում իրականությանը։
«Մեզ մեղադրում են, որ Հայաստան ներմուծելիս չենք հետևում ջերմաստիճանին։ Մենք կարող ենք պատասխանել, որ ապրանքի յուրաքանչյուր խմբաքանակի համար առաքիչից պահանջում ենք սառնարանում ջերմաստիճանային ռեժիմի մասին եզրակացություն։ Սննդամթերքի անվտանգության պետական ծառայությունում գիտեն այդ մասին։ Իսկ ներքին առաքումների համար մեր ֆուրգոններն առաջինն են պետական ծառայության սանիտարական անձնագիր ստացել մսի մատակարարների շարքում», – հայտարարեց նա։
«Բացառված չէ, որ հալեցում կարող էր տեղի ունենալ մանրածախ ցանցում։ Թեև մենք դրան էլ ենք հետևում։ Մենք ապրանք չենք տալիս նրանց, ովքեր չեն հետևում ջերմաստիճանային ռեժիմին։ Իհարկե, ոչ ոք ապահովագրված չէ թերություններից` ո՛չ մենք, ո՛չ խանութները։ Բայց մենք հետևում ենք նման դեպքերին և պարզում` չեն խախտվել արդյոք պահպանման կանոնները», – հայտարարեց Գիգոլյանը։
Ապրանքի մակնշումը նույնպես արվում է նշված կարգով։ Արտադրողը մակնշում անում է ռուսերեն, ներկրողը` հայերեն, հավելեց նա։
