ԵՐԵՎԱՆ, 26 հուլիսի — Sputnik. ՀՀ վարչապետ Նիկոլ Փաշինյանը մտադիր է երկրի Սահմանադրության մեջ փոփոխություններ մտցնել ու օգտագործել սփյուռքի ներուժը Հայաստանի զարգացման համար։ Այս մասին նա հայտնել է «Էխո Մոսկվի» ռադիոկայանի հետ հարցազրույցում։
Նա նշել է, որ այս պահին Սահմանադրությունը խոչընդոտում է սփյուռքահայերին կառավարական հարցերում գրավելուն։ Օրինակ` նախարար կարող է նշանակվել միայն այն քաղաքացին, որը վերջին հինգ տարիների ընթացքում միայն Հայաստանի քաղաքացի է ու մշտապես հանրապետությունում է բնակվել։
«Հիմա մենք պատրաստվում ենք փոխել Սահմանադրության այդ հոդվածը, որ կարողանանք օգտագործել մեր սփյուռքի ներուժը։ Խոսքն, այդ թվում նաև Ռուսաստանի հայ համայնքի մասին է, որ կարողանանք հրավիրել նրանց նոր Հայաստանը կառուցելու գործին մասնակից լինելու», – հայտնել է նա։
Փաշինյանն անդրադարձել է նաև խորհրդարանական ընտրությունների հնարավոր օրվան։ Նրա խոսքով` դա կարող է լինել և՛ հոկտեմբերին, և՛ նոյեմբերին, և՛ դեկտեմբերին, և նույնիսկ մյուս տարվա մայիսին։ Միաժամանակ, նա կարևորել է սեպտեմբերին կայանալիք Երևանի քաղաքապետի ընտրությունները։
