ԵՐԵՎԱՆ, 26 հուլիսի – Sputnik. ՀՀ վարչապետ Նիկոլ Փաշինյանը բացասական պատասխան է տվել «Էխո Մոսկվի» ռադիոկայանի այն հարցին` արդյո՞ք երկիրը ձգտում է ՆԱՏՕ–ում հայտնվել։
«Ոչ, իհարկե։ Ոչ։ Մենք հիմա ՀԱԿՊ անդամ ենք, մեր նպատակն այն է, որ Հայաստանի մասնակցությունն այդ կազմակերպությունում ավելի արդյունավետ դառնա։ Որոշ հարցեր ունենք ՀԱՊԿ–ի մեր գործընկերներին, մեր նպատակն է հիմա այդ կազմակերպությունն ավելի արդյունավետ դարձնել», – ասել է Փաշինյանը։
ՀՀ վարչապետն ընդգծել է, որ Բրյուսելում մասնակցել է ոչ թե բուն ՆԱՏՕ–ի գագաթնաժողովին, այլ այն երկրների գագաթնաժողովին, որոնք մասնակցում են դաշինքի շրջանակում Աֆղանստանում խաղաղապահ առաքելությանը։
Փաշինյանի խոսքով` ՆԱՏՕ–ն Հայաստանի հետ որոշ ծրագրեր ունի։ Հայաստանը մասնակցում է նաև Կոսովոյի խաղաղապահ առաքելությանը։
«Առաջին տարին չէ, որ մենք ՆԱՏՕ–ի հետ համագործակցում ենք, դա բավականին երկար ծրագիր է։ Ու դա շարունակվելու է», – ասել է Փաշինյանը։
Միաժամանակ վարչապետը նշել է, որ համագործակցությունը որևէ մեկի դեմ ուղղված չէ։ Այն տարածաշրջանային համագործակցության միջոց է (Հայաստանն այդ շրջանակում համագործակցում է Վրաստանի հետ)։
Փաշինյանն ասել է, որ ցավոք, այդ առումով Հայաստանի ու Վրաստանի քաղաքականությունները տարբեր են, ու կողմերը պետք է որևէ կերպ հավասարակշռեն այդ իրավիճակը։ Նրա խոսքով` ՆԱՏՕ–ի շրջանակում Թբիլիսիի ու Երևանի հարաբերությունները կարևոր են։
