ԵՐԵՎԱՆ, 24 հուլիսի — Sputnik. Դժվար է պատկերացնել, որ Նիկոլ Փաշինյանի «Քաղաքացիական պայմանագիր» կուսակցությունը ցանկանա կրկնել Հայաստանի Հանրապետական կուսակցության սխալները և գնի ընտրողների ձայները։ Այս մասին երեքշաբթի լրագրողներին ասաց ՀՅԴ պատգամավոր Արմեն Ռուստամյանը` մեկնաբանելով Երևանի քաղաքապետարանի և ավագանու գալիք ընտրությունները։
«Իհարկե, մինչև մեր աչքերով չտեսնենք, որ ամեն ինչ մաքուր է, ոչինչ չենք կարող ասել։ Բայց կարծում ենք, որ հեղափոխական ալիքի վրա եկած իշխանությունը չի կրկնի նախորդ իշխանությունների սխալները։ Թեկուզ այն պատճառով, որ անձամբ տեսել են այդ իշխանության ճակատագիրը», — ասաց Ռուստամյանը։
Քվեներ գնելու պայմանները նվազել են, ուստի այս անգամ ՀՅԴ-ն մտածում է ընտրություններին մասնակցելու մասին։
«Երևանի քաղաքապետի նախորդ ընտրությունները մենք բաց թողեցինք հենց այն պատճառով, որ ընտրակաշառք էին բաժանում։ Մենք դա տեսել ենք նաև ԱԺ-ի վերջին ընտրությունների ժամանակ և հայտարարել ենք այդ մասին, թեև իշխող կոալիցիայի մեջ էինք», — նշեց Ռուստամյանը։
Հիշեցնենք, որ 2017թ-ի գարնանը Երևանի ավագանու խորհրդի նախորդ ընտրություններին մասնակցել են միայն երեք ուժեր` ՀՀԿ-ն, «Ելք» դաշինքը և «Երկիր ծիրանի» կուսակցությունը։ Երևանի քաղաքապետ Տարոն Մարգարյանի հրաժարականից հետո ՀՀԿ-ն չի պատրաստվում նոր թեկնածու առաջադրել։ Նշանակում է` սեպտեմբերին պետք է անցկացվեն նոր ընտրություններ։ Առայժմ հայտնի չէ` ՀՀԿ-ն կմասնակցի, թե ոչ։
