ԵՐԵՎԱՆ, 24 հուլիսի — Sputnik. Պետք է խստորեն սահմանափակել կուսակցությունների քարոզչական ծախսերը, իսկ գերազանցելու համար` պատժել։ Ազգային ժողովում հավանություն տվեցին Ընտրական օրենսգրքում (ԸՕ) այս փոփոխությունն անելու առաջարկին։
ԸՕ-ի բարեփոխումների վերաբերյալ քննարկումներին մասնակցում են չորս խորհրդարանական ուժերից երեքական պատվիրակ։
Ընտրական օրենսգրքում նշված է, որ քաղաքական ուժի նախընտրական հիմնադրամը (լինի կուսակցություն կամ կուսակցությունների դաշինք) չպետք է գերազանցի 100 միլիոն դրամը:
Հիմա առաջարկում են պատժել այն կուսակցություններին, որոնք կգերազանցեն այդ ծախսերը։ Եթե գերծախսը կազմի ավելի քան 20%, կուսակցությունը կհեռացվի նախընտրական քարոզարշավից։ Եթե գերծախսը 20%-ից պակաս լինի, ապա կուսակցությանը կտուգանեն դրա եռակի չափով ու նույնքան կկրճատեն հիմնադրամը։ Օրինակ եթե կուսակցությունը քարոզչության համար 100 միլիոն դրամ առանձնացնի ու, բացի դրանից, ևս 15 միլիոն ծախսի, ապա 45 միլիոն դրամով կտուգանվի, ու նույն չափով կկրճատվի այդ կուսակցության հիմնադրամի ծավալը։
Իսկ ի՞նչ անել, եթե կուսակցության պաստառներն ու այլ խորհրդանիշերը սոցիալական ցանցերով են տարածում։ «Ծառուկյան» դաշինքը կողմ է սոցիալական կայքերը հսկելուն։
«Հակառակ դեպքում մեր կամ ցանկացած այլ կուսակցության մրցակիցները կարող են կեղծ էջեր ստեղծել ու դրանց միջոցով մեր խորհրդանիշները տարածել։ Իսկ հետո կասեն. «Դուք չափից շատ պաստառ եք տարածել, ձեր քարոզչական հիմնադրամը գերազանցված է»։ Այստեղ իրար վատություն անելու նոր տարբերակ է ի հայտ գալիս», — ասաց «Ծառուկյան» դաշինքի պատգամավոր Սերգեյ Բագրատյանը։
Ի պատասխան դրա ՀՀԿ ներկայացուցիչ Դավիթ Հարությունյանը հակաճառեց, որ սոցիալական կայքերի հսկողությունը հսկայական բեռ կդառնա ԿԸՀ-ի ու կուսակցությունների համար։
Հաշվի առնելով սա` գերծախսի համար պատիժը հավանության արժանացավ, իսկ սոցիալական կայքերի հարցը մնաց օդում։
