Հայաստանի փրկարարները Հունաստանից օգնության հրավեր այս պահին չեն ստացել։ Այսօր լրագրողների հետ հանդիպմանը հայտնեց Արտակարգ իրավիճակների նախարարության Ճգնաժամային կառավարման ազգային կենտրոնի պետ, փրկարար ծառայության գնդապետ Հովհաննես Խանգելդյանը։
«Մենք ունենք միջազգային բոլոր ստանդարտներին համապատասխանող, ամեն ինչով պատրաստված 3 փրկարարական խումբ, որոնք թե՛ մեր երկրում և թե՛ արտասահմանում արտակարգ իրավիճակի դեպքում պատրաստ են մեկնել ու աջակցել»,- ասաց Խանգելդյանը։
Նա նաև հայտնեց, որ Իրանից ևս հայ փրկարարներն աջակցության հրավեր չեն ստացել` կապված նախօրեին այդ երկրում տեղի ունեցած երկրաշարժի հետ։
Հիշեցնենք` հուլիսի 23-ին Հունաստանում զանգվածային անտառային հրդեհ է բռնկել, որի պատճառով մարդիկ ստիպված են եղել փախչել տներից։ Կրակի դեմ պայքար են մղում 110 հրշեջ փրկարար և 47 տրանսպորտային միջոց: Հրդեհի հետևանքով 69 մարդու հիվանդանոց են տեղափոխել։
Իրանում հուլիսի 22-23-ը 4 երկրաշարժ է գրանցվել, որոնցից ամենաուժեղն էպիկենտրոնում կազմել է 8 բալ։ Փլվել են 101 շինություն, մասնակի վնասվել` 850-ը, 287 քաղաքացի հոսպիտալացվել է։
