ԵՐԵՎԱՆ, 22 հուլիսի — Sputnik, Մարիա Շելուդյակովա․ Ծանր սև վարագույրներ, էլեկտրական լույս, լուսային սեղան, որի վրա դրված են տիկնիկները․ այդպիսի տեսք ունի տաղավարը, որտեղ հայ ուսանողուհի Մանեն նոր անիմացիոն ֆիլմ է նկարում։
Տիկնիկները լավաշ են թխելու։ Մանեի կուռքերն են ամերիկացի կինոռեժիսոր Վուդի Ալենը և մուլտիպլիկատոր Թիմ Բերտոնը, իսկ իր ֆիլմում նա հղում է անում ռեժիսոր Սերգեյ Փարաջանովի արվեստը, որը հմտորեն օգտագործել է տարբեր կտորներ, ժանյակ և կոլաժներ։
«Ընդհանուր նախագծի իմ մասի համար ես ընտրել եմ դիրքափոխման տեխնիկան՝ օգտագործելով կտորներ։ Տիկնիկները ես եմ կարել, թեև նախկինում երբեք նման բան չեմ արել», — նշեց Մանեն` հավելելով, որ իր ազգային մշակույթը միջազգային նախագծում ներկայացնելը հետաքրքիր և կարևոր խնդիր է։
Մանեն սովորում է Երևանի թատրոնի և կինոյի պետական ինստիտուտի կինոյի ռեժիսուրա բաժնում, բայց աշխատում է անիմացիայի ոլորտում։ Չնայած երիտասարդ տարիքին՝ նա արդեն փորձառու մուլտիպլիկատոր է։ Մի քանի փառատոներում ցուցադրվել են նրա հեղինակային ֆիլմերը, ստանում է կոմերցիոն պատվերներ, անցկացնում կարճամետրաժ կինոյի նկարահանումներ։ Մանեն մանկուց երազել է սովորել ԿՀՊԻ-ում և ամառային դպրոցում նա համոզվեց, որ այստեղ սովորելը շատ է տարբերվում Հայաստանի կրթական գործընթացից։
«Հետևություն արեցի, որ ԿՀՊԻ-ում կրթությունն ավելի պրոֆեսիոնալ մակարդակով է», — ասաց նա, նշելով, որ վարպետության դասերից մեկն անցկացրել է լեգենդար «Ոզնին մառախուղի մեջ» մուլտֆիլմի ստեղծող Յուրի Նորշտեյնը։
Այս տարի ԿՀՊԻ-ի ամառային կինոդպրոց են եկել աշխարհի տարբեր երկրների բուհերի ռեժիսորական և օպերատորական ֆակուլտետների ուսանողներ։ Երիտասարդ անիմատորները երկու շաբաթ շարունակ մասնակցում են գործնական պարապմունքների և վարպետության դասերի։ Նրանց լարված աշխատանքի արդյունքը կդառնա անիմացիոն ֆիլմի պրեմիերան, և յուրաքանչյուր երկիր պետք է ընդհանուր պատմության մեջ ունենա իր դրվագը։
Եզրափակիչ անիմացիոն ֆիլմի գլխավոր հերոսը բրազիլացի պարող է։ Քամին քշում է նրա գլխարկը, և նա տարբեր երկրներով գնում է գլխարկի հետևից։ Հայկական հատվածում բրազիլացին տեսնում է լավաշ թխողների, և նրանք նրա համար գլխարկ են պատրաստում հացից։ Լավաշ թխելը տիպիկ հայկական սյուժե է, բացատրում է ուսանողուհին։ Հրաժեշտ տալով հացթուխներին՝ պարողը շարունակում է իր ճանապարհորդությունը։ Այն ավարտվում է Կրասնոդարում, որտեղ տեղի կունենա կինոդպրոցի փակումը։
Աղջիկը պատմեց նաև երևանյան իր կյանքի մասին։
«Հայաստանում երիտասարդ անիմատորների համար հիմա բարդ է։ Իսկապես քիչ են մարդիկ, որոնք կարող են օգտակար լինել և նոր տեխնիկաներ սովորեցնել։ Իհարկե, կան իսկական պրոֆեսիոնալներ, բայց նրանց մեծամասնությունն օգտագործում է ավանդական տեխնոլոգիաներ։ Ստիպված ենք լինում ինքներս տեղեկատվություն որոնել կամ մեկնել արտասահման՝ որակավորումը բարձրացնելու համար։ Բայց նույնիսկ, եթե ստացվի ձեռք բերել նոր գիտելիքներ, Հայաստանում դժվար է կիրառել դրանք», — ասաց Մանեն։
Հայրենիքում անիմացիայի ոլորտում աշխատանք գտնելը բավական բարդ է․«Հայաստանում հետաքրքիր նախագծերի մասնակցելը, որոնք ոչ միայն փող կբերեն, այլ նաև հաճույք, մեծ հաջողություն է։ Ես կուզեի աշխատանք գտնել խոշոր ստուդիաներում, որոնք տեսանյութ են նկարում նորաձևության ինդուստրիայի մասին, բայց առայժմ աշխատում եմ ծրագրեր չկազմել և վայելել ստեղծագործական գործընթացը», — ասաց նա։
ԿՀՊԻ միջազգային ամառային կինոդպրոցը 2018թ-ին աշխատում է «Կրասնոդար՝ Կուբանի հոգին» կարգախոսով։ Դպրոցի վավերագրական բաժնի աշխատանքներն ընթանում են Կրասնոդարում, իսկ անիմացիոն բաժնի՝ Մոսկվայում։ Կինոդպրոցն ամեն տարի բացում է իր դռները, մասնակցության հայտ կարող են ներկայացնել անիմացիա, մուլտիմեդիա կամ համակարգչային գրաֆիկա ուսումնասիրող ուսանողները։
