ԵՐԵՎԱՆ, 28 փետրվարի — Sputnik. «Գտնված երազ» լեգենդար մուլտֆիլմի հեղինակները` ռեժիսորներ, նկարիչներ, դիզայներներ Հովհաննես և Գագիկ Դիլաքյանները ձևավորել են ամերիկյան հայտնի մոդել, «Թոփ մոդել ամերիկյան ձևով» շոուի ամենավառ մասնակիցներից մեկի` Ֆաթիմա Սիադի տունը։
Եղբայրները Facebook-ի իրենց էջում ինքնատիպ դիզայնով տեսահոլովակ են ներկայացրել։
«Մոդել Ֆաթիմա Սիադի տունը, որը ձևավորել են Դիլաքյան եղբայրները Նյու Յորքում», —տեսահոլովակին կից գրել են եղբայրները։
Տեսահոլովակում սևամորթ մոդելը ցուցադրում է իր տան նոր դիզայնը։ Դատելով նրա մեկնաբանությունից` աղջկան շատ է դուր եկել դիզայներների մտահղացումը։
Հովհաննես և Գագիկ Դիլաքյանները երկար տարիներ ապրում են Նյու Յորքում, սակայն հայրենիքի հետ կապը չեն կորցնում։ Վերջին տարիների ընթացքում հաճախ են գալիս հայրենիք։ 1976 թվականին նկարահանված «Գտնված երազ» մուլտֆիլմը, որը շատերի մանկության անբաժանելի մասը դարձավ, հավանաբար շարունակություն կունենա, և եղբայրները կշարունակեն երազը կորցրած պապիկի պատմությունը։
Ֆաթիմա Սիադը հաջողակ մոդել է, որը նկարահանվում է Vogue, Elle ամսագրերի համար, մասնակցում է համաշխարհային Նորաձևության շաբաթներին, ինչպես նաև նկարահանվում է Ralph Lauren և Herve Leger-ի պես հայտնի ապրանքանիշների գովազդային արշավներում։ Նա հայտնի է դարձել «Թոփ մոդել ամերիկյան ձևով» հայտնի ամերիկյան շոուին մասնակցելուց հետո։ Նրան շոուի ամենավառ մասնակիցներից մեկն են համարում։
