ԵՐԵՎԱՆ, 20 հուլիսի — Sputnik. Հեղափոխությունից հետո Նիկոլ Փաշինյանը ժառանգեց Սերժ Սարգսյանի «հագով կարված» սուպերվարչապետական համակարգը։ Այսօր լրագրողների հետ հանդիպմանը, լրագրողի սուպերվարչապետության մասին նման դիտարկմանը Փաշինյանն արձագանքեց` սազո՞ւմ է։
Վարչապետը նաև հայտարարեց, որ առաջիկայում պատրաստվում է հրաժարվել Սերժ Սարգսյանի օրոք ստեղծված սուպերվարչապետության համակարգից, բայց և չհամաձայնեց, որ վարչապետի ու նախագահի լիազորությունները պետք է համարժեք լինեն։ «Պետությունը չի կարող ունենալ երկու ղեկավար»,–ասաց նա։
Հավասարության նշան պետք է դրվի խորհրդարանի, կառավարության ու դատական համակարգի միջև։ Իսկ չորրորդ իշխանությունը` մամուլը, պետք է ուժեղացվի երկրում տեղի ունեցող գործընթացները վերահսկելու համար։
Բայց սպասվող փոփոխությունները տեղի կունենան միայն ընտրություններից հետո, քանի որ հեղափոխությունից հետո նոր ցնցումներն ավելորդ են։