ԵՐԵՎԱՆ, 29 հուլիսի — Sputnik. ԵՐԵՎԱՆ, 19 հուլիսի — Sputnik. Վարչապետը գրքերը փոխարինել է կառավարության որոշումների նախագծերով ՝ նա շատ զբաղված է։ Այդ մասին Նիկոլ Փաշինյանը կատակով ասաց «Զանգակ» գրախանութի բացման ժամանակ։
Վարչապետն այնտեղ էր դուստրերի՝ Արփիի և Շուշանի հետ։ Նրան ուղեկցում էին նաև կրթության և գիտության նախարար Արայիկ Հարությունյանը, մշակույթի նախարար Լիլիթ Մակունցը։
Փաշինյանին հարցրեցին նրա գրական նախասիրությունների մասին, մասնավորապես, կարդու՞մ է նա արդյոք հայ հեղինակների։
«Կարդում եմ նաև հայ հեղինակների, այդ թվում՝ ժամանակակից։ 2016թ-ը ես ինձ համար հայտարարել էի ժամանակակից հայ գրողների տարի։ Ես լավ սկսեցի տարին, բայց, ցավոք, հետո տեմպը դանդաղեց։ Բայց շատ բան եմ հասցրել», — ասաց Փաշինյանը։
Նրա խոսքով՝ «թավշյա հեղափոխության» ընթացքում կարդալու շատ ժամանակ չուներ: Հիմա էլ կարդում է կառավարության որոշումների նախագծերը՝ կատակեց վարչապետը։
Փաշինյանին առաջարկեցին գրքի տոնավաճառ անցկացնել և այդ ընթացքում փակել երթևեկությունը մեքենաների համար՝ հաշվի առնելով, որ Աբովյան փողոցում արդեն 3 գրախանութ կա։
Փաշինյանը կրկին կատակեց, ասելով, որ հիմա փողոց փակելը նորաձև է և խոստացավ մտածել այդ ուղղությամբ։
Վարչապետը շրջեց գրախանութում, իր և երեխաների համար գնեց 32,5 հազար դրամի գիրք։ Նրան խնդրեցին ընդունել դրանք որպես նվեր, բայց նա հրաժարվելով՝ վճարեց։
Վերջում Փաշինյանը մի քանի գիրք ստորագրեց խանութի հյուրերի և գնորդների համար։
