ԵՐԵՎԱՆ, 19 հուլիսի — Sputnik. «Բնապահպանի տուն» հասարակական կազմակերպության մի խումբ անդամներ ապօրինի անտառահատումների դեմ պայքարի շրջանակում հուլիսի 18-ին ակցիա են իրականացրել Դիլիջանի համայնքի Հաղարծին բնակավայրում, որի ընթացքում վեճ, ապա և ծեծկռտուք է սկսվել նրանց ու բնակիչների միջև: Ոստիկանությունից հայտնում են, որ շտապ դեպքի վայր ժամանած ոստիկանության ծառայողները միջոցներ են ձեռնարկել ծեծկռտուքը դադարեցնելու, կողմերին օրինականության դաշտ բերելու, ինչպես և դեպքի պատճառներն ու մասնակիցների ինքնությունը պարզելու ուղղությամբ:
Նույն օրվա երեկոյան «Դիլիջան» բժշկական կենտրոն է տեղափոխվել Հաղարծինի բնակչուհի, 88-ամյա Ռոզա Թ.-ն, որը հիվանդանոց մեկնած ոստիկանության Դիլիջանի բաժնի օպերատիվ խմբին հաղորդում է տվել, որ ժամը 19.00-ի սահմաններում իրենց տնից ոչ հեռու նկատել է հավաքված երիտասարդների ու հարցրել է, թե ինչու են հավաքվել: Երիտասարդները պատասխանել են, թե պայքարում են ապօրինի ծառահատումների դեմ: Ըստ Ռոզա Թ.-ի` ինքը առաջարկել է հեռանալ իրենց թաղամասից, ինչից հետո երիտասարդներից մեկը անսպասելի հրել է նրան, ինչի հետևանքով կինը վայր է ընկել, ստացել մարմնական վնասվածքներ, ապա տեղափոխվել է «Դիլիջան» բժշկական կենտրոն:
Ժամը 21.10-ին, ոստիկանության Դիլիջանի բաժնում նույն բուժկենտրոնից հաղորդում է ստացվել, որ տարբեր տեսակի և աստիճանի մարմնական վնասվածքներով բուժօգնության են դիմել Դիլիջանի բնակիչ, 27-ամյա Հայկ Խ.-ն, Գյումրու բնակիչ, 23-ամյա Դավիթ Մ.-ն, Երևանի բնակիչ, 17-ամյա Գագիկ Ջ.-ն և Դիլիջանի բնակիչ, 15-ամյա Արծիվ Կ.-ն:
Հիվանդանոց մեկնած օպերատիվ խմբին նրանք հայտնել են, որ իրենք «Բնապահպանի տուն» հ/կ անդամներն են և վնասվածքները ստացել են ժամը 17.30-ից 19.00-ն ընկած ժամանակահատվածում Դիլիջան համայնքի Հաղարծին բնակավայրում տեղի ունեցած վերոհիշյալ ծեծկռտուքի երկու դեպքերի ժամանակ:
Ոստիկանության ձեռնարկած անհետաձգելի ու ծավալուն միջոցառումների շնորհիվ պարզվել է, որ, ըստ նախնական տեղեկությունների, ծեծկռտուքի ժամանակ երիտասարդներին մարմնական վնասվածքները պատճառել են Ռոզա Թ.-ի որդին ու թոռները:
Ոստիկանների հետագա գործողություններով Ռոբերտ, Գևորգ, Շահեն, Նվեր Մ.-երը հայտնաբերվել, բերվել են ոստիկանության բաժին ու տվել համապատասխան բացատրություններ:
Միջադեպի վերաբերյալ բացատրություններ են վերցվել նաև գյուղի տասնյակից ավելի բնակիչներից:
«Բնապահպանական տուն» նախաձեռնության ֆեյսբուքյան էջում ծեծեկռտուքն այլ կերպ է ներկայացվում։
«Երբ մեր ազգի լավագույն ջահելությունը, որը հեղափոխությունը զրոյից իրականացրեց ու անպարտելի թվացող ՀՀԿ-ական վիշապին հաղթեց, հիմա էլ բախվում է հենց նույն ազգի անասուն մտածելակերպի հետ: Տարիներ շարունակ Թեղուտ ու Հաղարծին գյուղերի բնակչության մի հսկայական զանգված կաշառք է տվել, ապօրինի անտառ է ոչնչացրել ու հիմա էլ չի հասկանում, որ բնությունը վերացնելով երկիրդ ես վերացնում: Էս տղերքն ու ևս 26 հոգի ու տասնյակ կամավորներ իրենց դարդն ու ցավը թողած հսկում են անտառը իսկ գյուղացիք մի քանի կոպեկի համար շարունակում են գողություն անել ու մարդ ծեծել: Ընդամենը ժամ առաջ 30 հոգով հարձակվել են մեր կամավորների վրա, հայհոյել, վիրավորել ու հարվածներ հասցրել»,- գրված է նրանց էջում։
Ոստիկանությունը նշել է, որ այժմ քննությունն է ընթանում։
