ԵՐԵՎԱՆ, 18 հուլիսի — Sputnik. Եվրոպական հանձնաժողովի նախագահ Ժան-Կլոդ Յունկերը համաձայնել է Երևան գալ, մայրաքաղաքի գլխավոր հրապարակում խորոված պատրաստել ու հանրահավաք կազմակերպել։ Այս մասին նա հայտնել է ռուս պրանկերներ Լեքսուսին (Ալեքսեյ Ստոլյարով) ու Վովանին (Վլադիմիր Կուզնեցով), որոնք զանգահարել էին եվրոպացի պաշտոնյային ու ասել, որ նրա հետ ՀՀ վարչապետ Նիկոլ Փաշինյանն է խոսում։ Այս մասին հայտնում է ՌԻԱ Նովոստին։
Լեքսուսն ու Վովանը բողոքել են Յունկերին, որ Վաշինգտոնը ճնշում է Երևանին։ Եվրահանձնաժողովի ղեկավարն իր հերթին բողոքել է «Փաշինյանին» ԱՄՆ-ի նախագահի Դոնալդ Թրամփից` հայտնելով, որ նա չի ընդունում աշխարհի կառուցվածքն ու չի գիտակցում` Հայաստանում ինչ է կատարվում։
Յունկերը համաձայնել է Երևանում հանրահավաք կազմակերպել ու մյուս տարի գալ խորոված ուտելու, որից հետո հաջողություն է մաղթել «Հայաստանի վարչապետին»։
Ինչ վերաբերում է Ֆեդերիկա Մոգերինիին, ապա եվրոպական դիվանագիտության ղեկավարն ասել է` Բրյուսելում կարծում են, որ Հայաստանի համար ճիշտ կլինի լավ հարաբերություններ պահպանել բոլոր գործընկերների հետ և ընտրություն չանել միայն մեկ կողմի օգտին։
Նրա խոսքով` դա թույլ կտա խուսափել Հայաստանում «ուկրաինական սցենարի» կրկնությունից։
«Պետք է ընդգծել` Հայաստանն այն երկիրն է, որը սեփական ընտրություն անելու իրավունք ունի», — հայտնել է Մոգերինին` նշելով, որ Բրյուսելը «բացառիկ պայմաններով բարեկամություն» չի խնդրում։
«Մենք գիտենք ու կարծում ենք, որ դուք կարող եք բարեկամական ու գործընկերական հարաբերություններ ունենալ աշխարհի երկրներից շատերի հետ այն պայմանով, որ դուք ազատ եք ու կարող եք ինքնուրույն ընտրություն կայացնել ու համապատասխան միջոցներ ձեռնարկել։ Դա մեր մոտեցումն է։ Ես գիտեմ, որ նախկինում մենք այլ մոտեցում ենք ունեցել, բայց մեզ համար շատ կարևոր է, որ դուք զգաք այդ ազատությունը ու գործողությունների համար տարածք ունենաք, որ ստիպված չլինեք այս կամ այն գործընկերոջ օգտին ընտրություն կատարել», — մեջբերում է Մոգերինիի խոսքը ՌԻԱ Նովոստին (գործակալությունն ունի զրույցի ձայնագրությունը)։
Հիշեցնենք` ավելի վաղ Լեսքուսի ու Վովանի թակարդն էին ընկել Բորիս Ջոնսոնը, որն այդ պահին Մեծ Բրիտանիայի արտգործնախարարն էր, նաև ԵԱՀԿ գլխավոր քարտուղար Թոմաս Գրեմինգերը։
