ԵՐԵՎԱՆ, 15 հուլիսի — Sputnik. ԱՄՆ-ի ազգային աստղատիեզերական գործակալությունը`NASA–ն, հրապարակել է Մարսի հարավայից բևեռից ոչ հեռու տարածված անսովոր օբյեկտների լուսանկարներ։ Բրիտանական Sunday Express-ը հաղորդում է, որ սև կետերը նկատել է NASA-ի համակարգի մեջ մտնող Mars Orbiter միջմոլորակային կայանը։
Մարսի վրա սառույց կա, որի բաղկացության մեջ նաև ջուր է մտնում, բայց հիմնականում` երկօքսիդ ածխածնից է։ Երբ մոլորակի վրա գարուն է լինում (ժամանակային առումով այն չի համընկնում երկրային գարնան հետ), սառույցի շերտերը սկսում են հալվել։ CO2-ը այս դեպքում վերածվում է ոչ թե հեղուկի, այլ` միանգամից գազի։ Սառույցի շերտի տակ գազ է հավաքվում, որը մեծ պայթյուններով դուրս է գալիս՝ առաջացնելով ճեղքեր։ Դրանք ցրվում են պայթյունից մի քանի կիլոմետր շառավղով և տիեզերքից հիշեցնում են սարդի ոտքեր։ Իսկ գազը իր հետ վերցնում է Մարսի փոշին, որը «սարդերին» ներկում է մուգ գույնով։
