ԵՐԵՎԱՆ, 11 հուլիսի — Sputnik. ԱԺ արտահերթ նիստն այսօր մեկնարկեց պատգամավորական երդումով: Խորհրդարանականները շնորհավորեցին «Ծառուկյան» դաշինքի նոր պատգամավոր Հրանտ Դավթյանին: Նա 2017թ-ի ապրիլի 2-ի խորհրդարանական ընտրություններին մասնակցել է «Ծառուկյան» դաշինքի կազմում` առաջադրվելով թիվ 6 ընտրատարածքում՝ Արմավիրի մարզում:
Կենտրոնական ընտրական հանձնաժողով ներկայացրած գույքի ու եկամուտների հայտարարագրից պարզ է դառնում, որ նոր պատգամավորը ազդեցիկ ունեցվածքի տեր է:
Նա բաժնեմասեր ունի 7 առևտրային ընկերություններում: Զբաղվում է հիմնականում հեղուկ գազի վաճառքով` ունի գազալցակայան:
Արմավիրի մարզի Մուսալեռ գյուղում ունի ռեստորանային համալիր: Երևանում ունի խանութ:
Բացի այդ Էջմիածնում ունի շքեղ առանձնատուն`860քմ մակերեսով: Առանձնատանը կից առևտրային տարածքն ու ալրաղացը ևս պատկանում են իրեն: Հրանտ Դավթյանն ունի նաև հողամասեր`Արարատի մարզի Այնթափ, Արմավիրի մարզի Բաղրամյան և Այգեկ գյուղերում:
Նշենք, որ հունիսին մանդատից հրաժարվել էր Մերուժան Սիմոնյանը, որը 2017թ. ապրիլի 2-ին ԱԺ պատգամավոր էր ընտրվել «Ծառուկյան» կուսակցությունների դաշինքի թիվ 12 ընտրատարածքի տարածքային ընտրական ցուցակով: Նրա հեռանալուց հետո մանդատը պետք է անցներ «Ծառուկյան» դաշինքի այն թեկնածուին, որը Սիմոնյանից հետո այդ ընտրատարածքում ամենից շատ ձայներ է հավաքել։ Բայց մյուս «ծառուկյանականները» ինքնաբացարկ էին ներկայացրել, և մանդատը ստացել է համամասնական ցուցակով հաջորդը` Հրանտ Դավթյանը Էջմիածնից (ավելի վաղ արդեն դարձել է պատգամավոր)։
