ԵՐԵՎԱՆ, 11 հուլիսի — Sputnik. Գեներալ Մանվել Գրիգորյանի հիվանդություններն անհամատեղելի են կալանքի հետ։ Sputnik Արմենիայի հետ զրույցում այս մասին ասաց նրա փաստաբան Արսեն Մկրտչյանը։
«Չէի ուզի այդ մասին խոսել, բայց բնականաբար, եթե նա կալանքի տակ է, առողջությունն էլ վատանում է»,- ասաց նա։
Փաստաբանը նշեց, որ Մանվելի Գրիգորյանի գործում իրավիճակի փոփոխություն չկա։
«Իրավիճակը կարող է ցանկացած պահի փոխվել։ Լավ կլինի, որ դա տեղի ունենա օր առաջ»,- ասաց նա։
Նշենք, որ ավելի վաղ հայտնի էր դարձել, որ Մանվել Գրիգորյանի մոտ թոքի քաղցկեղ և շաքարային դիաբետ է ախտորոշվել։
Հիշեցնենք` ԱԱԾ-ն հունիսի 17-ին տեսանյութ էր հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Տեսանյութում երևում է, որ Մանվել Գրիգորյանին պատկանող հանգստյան գոտին վերածվել էր զինապահեստի, ռետրո և ժամանակակից տասնյակ ավտոմեքենաների ավտոպարկի: Ակնալճի ամառանոցը գեներալի համար ծառայել է նաև «զինվորի բաժին» նշագրումով սննդի, հիգիենիկ պարագաների, դեղորայքի, զինվորական հանդերձանքի պահեստարանի: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռևս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր։
Մանվել Գրիգորյանը կալանավորված է։
