ԵՐԵՎԱՆ, 6 հուլիսի-Sputnik. Երկրում տեղի ունեցած աղմկահարույց կոռուպցիոն բացահայտումների արդյունքում արդեն տասնյակ միլիոնավոր դոլարներ են բյուջե վերադարձվել։ Այս մասին ՀՀ վարչապետ Նիկոլ Փաշինյանը այսօր հայտնել է Վայոց Ձորում։
Այնուամենայնիվ, նա հստակ թիվ չի նշել` վախենալով ոչ ստույգ տվյալներ հայտնելուց։
Փաշինյանը վստահեցրել է, որ շուտով կամփոփվեն երկրում կոռուպցիայի դեմ պայքարի առաջին արդյունքները և տվյալները կհրապարակվեն։
Հարցին, արդյո՞ք նրան չեն ապշեցրել կոռուպցիայի ծավալները, վարչապետը պատասխանել է, որ դեռ վաղ է խոսել այդ երևույթի իրական ծավալների մասին։ Նա հավելել է, որ նրան ցնցել են կոռուպցիոներների ցինիկությունը։
Գործադիրի ղեկավարը տեղեկացրել է նաև, որ ՀՀ երրորդ նախագահ Սերժ Սարգսյանը իր ընտանիքի անդամների հետ առաջացած խնդիրների քաղաքական լուծումը գտնելու համար չի փորձել կապ հաստատել վարչապետի հետ։
Հիշեցնենք` Սարգսյանների ընտանիքի մի քանի անդամներ որպես մեղադրյալ են ներգրավված մի քանի քրեական գործերում։
«Բոլորն էլ գիտեն, որ այդպիսի բան չի լինելու։ Անիմաստ է այդ հարցով դիմել», – ընդգծել է վարչապետը։
Ավելին` Փաշինյանը նշել է, որ իշխանությունը նպատակ չունի կոնկրետ ընտանիք կամ կոնկրետ մարդու հետապնդել։
«Մենք գնում ենք իրավապահ մարմինների ստացած ազդակների, հայտարարությունների ու օպերատիվ տվյալների հետքերով», – հայտնել է վարչապետը։
Նա շեշտել է նաև, որ իրավապահները հանցագործությունների բացահայտման որևէ նորմա չեն կատարում։
Փաշինյանն ընդգծել է, որ իշխանության առջև այլ խնդիր կա. երկրում պետք է օրենքը գործի, իսկ իրավապահ մարմինները պարտավոր են արդյունավետ գործել։
