ԵՐԵՎԱՆ, 5 հուլիսի — Sputnik. Ավանդաբար միամանդատ շրջանի միջոցով ընտրվել են խոշոր գործարարները, որոնք աջակցել են Հայաստանի Հանրապետական կուսակցությանը։ Նախկին ընդդիմությունն անցել է իշխանության գլուխ, բայց դառը փորձից ելնելով նախկինի նման պահանջում է հրաժարվել տեղերից ընտրություններից։
Պատգամավորներին պետք է ընտրել միայն համամասնական ցուցակներով։ Այդ մասին խորհրդարանում ընտրական բարեփոխումների վերաբերյալ քննարկումների ժամանակ հայտարարեց «Ելք» դաշինքի պատգամավոր Լենա Նազարյանը։
Նախկին իշխանության փորձը ցույց է տալիս, որ տեղերից ոչ միշտ են խորհրդարան գալիս անթերի հեղինակությամբ մարդիկ. նրանք, մեղմ ասած, չեն զարդարում խորհրդարանը։ Ուստի կուսակցությունն ինքը պետք է որոշի իր թեկնածուներին, հայտարարեց նա։
«Բայց այդ ժամանակ իր ցուցակներում ոչ ոք չի ներառի շրջանների թեկնածուներին։ Եվ այդ ժամանակ քաղաքականությունը կկենտրոնանա միայն Երևանում։ Այնտեղ կձևավորվի կուսակցական վերնախավ, որը կգերիշխի։ Իսկ մարզերում քաղաքական կյանքը, քաղաքական մրցակցությունն ուղղակի կվերանա», – առարկեց ՀՀԿ ներկայացուցիչ Դավիթ Հարությունյանը։
Նրան սատարեց կուսակից Վիգեն Սարգսյանը։
«Իհարկե։ Յուրաքանչյուր մարզ ունի իր խնդիրները։ Եվ պետք է լինեն մարդիկ, որոնք կներկայացնեն դրանք երկրի օրենսդիր մարմնում», – հավելեց նա։
ՀՅԴ ներկայացուցիչներն առարկեցին։ Տեսականորեն` այո, բայց գործնականում մարզերից ընտրված պատգամավորները գրեթե երբեք չեն բարձրացնում մարզերի խնդիրները, հավելեց Արմեն Ռուստամյանը։
«Որ մարզից էլ ընտրվեն մեր թեկնածուները, հասարակությունն ամեն դեպքում մեզ կապում է ՀՅԴ–ի հետ, այլ ոչ թե այս կամ այն քաղաքի ու մարզի», – ասաց Արմեն Ռուստամյանը։
Նշենք, որ ՀՀԿ–ն ավանդաբար հանդես է եկել տեղերում ընտրությունները պահպանելու օգտին։ 2007թ–ից «Հանրապետականը» համալրվել է 25-30 միամանդատ պատգամավորներով, հիմնականում` խոշոր գործարարներով։ Շատ առումներով իրավիճակը կրկնվել է 2017թ–ի ընտրություններում, թեև միամանդատ շրջանները փոխարինվել են տարածքայինով։
Մի տարածքային տեղամասից կարող էին ընտրվել տարբեր կուսակցությունների ներկայացուցիչներ։ Բայց ՀՀԿ–ում կրկին ներառվել են ավելի քան տասնյակ գործարարներ` Սամվել Ալեքսանյանը, Արտակ Սարգսյանը, Միհրան Պողոսյանը և ուրիշներ (նախկին ընդդիմությունը նրանց անվանում էր «քրեաօլիգարխիկ համակարգի մաս»)։
Ավելի վաղ ՀՀԿ–ն կարող էր իրեն թույլ տալ տեղերում գրեթե անսահմանափակ ազդեցություն` առաջացնելով այդ ժամանակվա ընդդիմության դժգոհությունը։ Այժմ ճամբարները փոխվել են, բայց նախկին ընդդիմությունը` «Ծառուկյանը» և «Ելքը», իսկ նրանց հետ նաև Դաշնակցությունը նախկինի նման դեմ են տեղերում ընտրություններին։
