ԵՐԵՎԱՆ, 5 հուլիսի — Sputnik. Խորհրդարանում ընտրական բարեփոխումների քննարկման ընթացքում հանրապետականներն աչքի են ընկնում ոչ միայն լավ պատրաստվածությամբ, այլև հագուստի հարցում դրսևորած ազատությամբ։ Նախորդ տարիներին նրանք գրեթե միշտ կոստյումներով էին խորհրդարան գալիս։ Միայն ամենաշոգ օրերին դրանք կարող էին փոխարինել կարճաթև վերնաշապիկներով, պարտադիր` սպիտակ։
Հիմա, երբ ՀՀԿ–ն ընդդիմություն է, խմբակցության ներկայացուցիչները որոշել են շունչ քաշել։ Վիգեն Սարգսյանն ու Դավիթ Հարությունյանն արդեն երկրորդ օրն է սպորտային շապիկներով են քննարկումներին գալիս, իսկ Արփինե Հովհաննիսյանը` կեդերով։
Մնացածն աշխատում են պահպանել խիստ դրես կոդը։ Օրինակելի է դաշնակցական Սպարտակ Հարությունյանը, որին անկախ եղանակից պաշտոնական միջոցառումներին կարելի է տեսնել միայն խիստ կոստյումով։
Մնացած պատվիրակները (նրա դաշնակցական գործընկերները, նաև «Ծառուկյան» և «Ելք» դաշինքների ներկայացուցիչները) աշխատում են կրել սպիտակ վերնաշապիկներ ու սև և, քիչ թե շատ խիստ, կոստյումներ։
Չնայած դրան` ՀՀԿ–ն իրավական մարտերում տանուլ չի տալիս։ Այստեղ միանշանակ «թիմի ավագը» արդարադատության նախկին նախարար Դավիթ Հարությունյանն է, որը ընտրական օրենսգրքի վերջին խմբագրության հեղինակներից մեկն է։
Այսօր նա «հարձակողական» կարմիր շապիկով է նիստի եկել։ Նրա ակտիվությունը բացառապես պրոֆեսիոնալ դրսևորումներ ունի. քննարկումների ընթացքում նա բացարձակ կոռեկտ է։
