ԵՐԵՎԱՆ, 2 հուլիսի — Sputnik. Կարծում եք, որ Ադրբեջան այդ երկրի փողերով այցելած, շփման գծում եղած այսպես կոչված ռուս «փորձագետները» պետք է այլ բա՞ն ասեին։ Այս մասին լրագրողներին ասաց ՀՀ արտգործնախարարության մամուլի խոսնակ Տիգրան Բալայանը` անդրադառնալով երեկ ադրբեջանական մամուլում հայտնված ռուս «փորձագետների» գնահատականին։
«Պարզ է, որ այդ ամենը լավ մտածված բեմադրություն էր, որի նպատակը հենց այս հայտարարություններն էին։ Չեմ բացառում, որ այն ձևակերպումները, որոնք երեկ ողջ օրը տարածում և վայելում էին ադրբեջանական ԶԼՄ–ները, նախապես պատրաստած էին և հրամցրած այդ «փորձագետներին»»,–ասաց Բալայանը։
ՀՀ ԱԳՆ ներկայացուցիչը հիշեցնում է, որ Լեռնային Ղարաբաղի խնդրի կարգավորման վերաբերյալ Ռուսաստանի պաշտոնական դիրքորոշումը հայտնի է, այն պարբերաբար հաստատվում է բարձր մակարդակով։
Հիշեցնենք, որ ավելի վաղ Բաքվում անցկացվել էր պարզունակ և հավակնոտ «Ադրբեջանը Հարավային Կովկասում Ռուսաստանի միակ դաշնակիցն է» խորագրով համաժողովը։ Համաժողովին ռուսական կողմից մասնավորապես մասնակցել էին «Միջազգային Եվրասիական շարժման» առաջնորդ Ալեքսանդր Դուգինը, Պետդումայի պատգամավոր Դմիտրի Սավելևը, լրագրող Մաքսիմ Շևչենկոն և ռազմական վերլուծաբան Իգոր Կորոտչենկոն։ Նշված անձինք հանդես էին եկել Արցախյան հակամարտության կարգավորման հետ կապված մի շարք հակահայկական հայտարարություններով։ Այնուհետև ռուսական պատվիրակությունն այցելել էր Արցախի հետ շփման գիծ` Ջոջուղ Մարջանլի գյուղ, բարձրացել Լելե Թեփե բարձունք, որն Ադրբեջանի վերահսկողություն տակ էր անցել 2016 թվականի քառօրյայից հետո։
