ԵՐԵՎԱՆ, 2 հուլիսի — Sputnik. Դա արհամարհանք է համանախագահ երկրների նկատմամբ։ Այսպես որակեց Ադրբեջանի կողմից ՀՀ սահմանի Նախիջևանի հատվածում դիրքային ամրապնդման գործողությունները ՀՀ արտաքին գործերի նախարարության մամուլի խոսնակ Տիգրան Բալայանը, իր ճեպազրույցի ընթացքում:
«Նորություն չէ, որ Ադրբեջանը գործում է ելնելով անպատասխանատվության սկզբունքից` իր իսկ կողմից ստանձնած պարտավորությունները չկատարելով: Մենք պարբերաբար այս հարցը բարձրացնում ենք ինչպես համանախագահ երկրների, այնպես էլ մեր մյուս գործընկերների ու կազմակերպությունների առջև: Կարծում ենք՝ հենց այստեղ համանախագահները լուրջ անելիքներ ունեն, որովհետև չանսալ նրանց հորդորներին և անել լրիվ հակառակը, առաջին հերթին արհամարհանք է համանախագահ երկրների հանդեպ»,-ասաց Տիգրան Բալայանը:
Հիշեցնենք, որ հուլիսի 1-ին ադրբեջանական ԶՈւ-երը նախիջևանյան ուղղությամբ որոշ տեղամասերում փորձել են դիրքային ամրապնդման ինժեներական աշխատանքներ իրականացնել, ինչին ի պատասխան ՀՀ ԶՈւ-երը պատասխան կրակ են բացել և թույլ չեն տվել հակառակորդին կատարել իր խնդիրը: Հայկական կրակից ամբողջությամբ ավերվել ու այրվել է հակառակորդի դիրքերից մեկը:
