ԵՐԵՎԱՆ, 30 հունիսի — Sputnik. ՀՀ արտակարգ իրավիճակների նախարար Հրաչյա Ռոստոմյանի գլխավորած պատվիրակությունը հունիսի 29-ին այցելել է Արցախի Հանրապետություն։ Այցի շրջանակում Հայաստանի արտակարգ իրավիճակների նախարարությունն արցախյան գործընկերներին է նվիրել «Մերսեդես Բենց» մակնիշի հատուկ փրկարար մեքենա։ Այս մասին հայտնում է ՀՀ ԱԻՆ մամուլի ծառայությունը։
Պայմանավորվածություն է ձեռք բերվել, որ երկու հայկական պետությունների համագործակցությունը շարունակական է լինելու։ Որպես հիմնական ուղղություններ նախանշվել են հակակարկտային պաշտպանության, հիդրոմետ ծառայության արդիականացման, սեյսմիկ անվտանգության ապահովման և այլ բնագավառները։
ՀՀ ԱԻ նախարարի գլխավորած պատվիրակությանն ընդունել է Արցախի Հանրապետության նախագահ Բակո Սահակյանը։ Հանդիպմանը, որին մասնակցել է նաև Արցախի ԱԻ ծառայության տնօրեն Կարեն Սարգսյանը, քննարկվել են երկու գործընկեր գերատեսչությունների միջև կապերի խորացմանն ու ընդլայնմանը վերաբերող մի շարք հարցեր:
Հայաստանի փրկարարներն արցախյան գործընկերներին են փոխանցել նաև մասնագիտական գրականության մեթոդական ձեռնարկներ։
