ԵՐԵՎԱՆ, 25 հունիսի — Sputnik. Սերժ Սարգսյանը կարող է մասնակցել Արցախի հարցով բանակցություններին, եթե վարչապետ Նիկոլ Փաշինյանի հետ պայմանավորվի Հանրապետական կուսակցության ապագայի շուրջ, Sputnik Արմենիային ասաց քաղտեխնոլոգ Վիգեն Հակոբյանը։
Ավելի վաղ վարչապետի` արտաքին քաղաքականության հարցերով խորհրդական Արսեն Խառատյանը հայտարարել էր, որ չի բացառում նախկին նախագահ Սերժ Սարգսյանին արցախյան հակամարտության կարգավորման բանակցություններում ընդգրկելու հնարավորությունը։
«Խառատյանն իր հարցազրույցում ասել է, որ դեմ չէ համագործակցել նախկին իշխանության ներկայացուցիչների հետ այն հարցերում, որոնցում նրանք կոմպետենտ են. առավել ևս, որ մի շարք հարցերում կան ընդամենը մի քանի մասնագետներ», – ասաց Հակոբյանը։
Նրա խոսքով` այդ հայտարարությունը բավական անսպասելի էր։ Բայց եթե նման տարբերակ իսկապես կա նոր կառավարության ծրագրերում, ապա Սարգսյանը կարող է հանդես գալ թե որպես խորհրդական, թե որպես բանակցող։
Նա Ուկրաինայի նախկին նախագահ Լեոնիդ Կուչմայի օրինակը բերեց և հավելեց, որ նման նախադեպեր էլի են եղել։
«Բազմաթիվ ձևաչափեր կան, որոնց միջոցով հնարավոր է ներգրավել նախկին նախագահին», – ասաց Հակոբյանը։
Փորձագետի կարծիքով` բաց է մնում մի հարց. Սերժ Սարգսյանը տեղյակ եղե՞լ է այդ նման տարբերակի հնարավորության մասին, թե այն պետք է դիտարկել որպես ուղերձ նախկին նախագահին։
Ամեն ինչ կախված է այն բանից, թե ինչպես կընթանան Սարգսյանի և Փաշինյանի բանակցությունները։
«Արցախի հարցում բանակցային գործընթացին Սերժ Սարգսյանի մասնակցության հավանականությունը կքննարկվի պայմանավորվածությունների փաթեթի շրջանակում։ Լիովին հնարավոր է, որ դա կապված կլինի գալիք ընտրությունների և Հանրապետական կուսակցության հետագա ճակատագրի հետ», – ասաց Հակոբյանը։
Քաղտեխնոլոգը հակված չէ կարծել, թե Սերժ Սարգսյանն այս հարցին կմոտենա ալտրուիզմով։ Բայց, եթե իրավիճակը շատ սրվի, ապա նախկին նախագահը (և ոչ միայն) կարող է ներգրավվել։
Հակոբյանը հիշեցրեց, որ երբ 2016թ.–ի ապրիլին կտրուկ ակտիվացել էր առաջին նախագահ Լևոն Տեր–Պետրոսյանը, Սերժ Սարգսյանը, չնայած քաղաքական տարաձայնություններին, գնացել նրա հետ հանդիպման։ Հետո Տեր–Պետրոսյանը մեկնել էր Արցախ. Արցախի նախագահ Բակո Սահակյանի խոսքով` Տեր–Պետրոսյանն այդ ժամանակ մեծ դեր խաղաց։
Քաղտեխնոլոգը ուշադրություն է հրավիրում այն փաստի վրա, որ այն ժամանակ Տեր–Պետրոսյանի` բանակցություններին մասնակցելու կարիքը չեղավ, բայց այս իշխանությունը, ակնարկում է, որ նման տարբերակ բացառված չէ։
