ԵՐԵՎԱՆ, 19 հունիսի — Sputnik. Գեներալ Մանվել Գրիգորյանի ընտանիքի որոշ անդամներ ինչ-որ գործողություններում ներգրավված են եղել։ Այդ մասին երեքշաբթի խորհրդարանում լրագրողներին ասաց Հայաստանի գլխավոր դատախազ Արթուր Դավթյանը։
Նրա խոսքով` քննությունը զբաղվում է այդ հարցով։
Դավթյանը հայտնեց նաև, որ Մանվել Գրիգորյանի նկատմամբ հարուցված քրեական գործով կան այլ կասկածյալներ ևս, որոնք առաջիկայում հարցաքննության են կանչվելու։
«Պարզ է, որ եթե Գրիգորյանն այդ ամենը ստացել է, ապա եղել է ինչ-որ մեկը, ով նրան փոխանցել է։ Կամ չի խանգարել ստանալ, այսինքն թույլ է տվել հանցավոր անգործություն։ Եթե դա հաստատվի, կարվեն համապատասխան հետևություններ», — ասաց դատախազը։
Այն հարցին, թե հարցաքննվելու է արդյոք նախկին նախագահ Ռոբերտ Քոչարյանը, Դավթյանը հայտարարեց. «Կհարցաքննվեն բոլոր նրանք, ում ցուցմունքներն անհրաժեշտ են գործի համար»։
Հիշեցնենք` ԱԱԾ-ն հունիսի 17-ին տեսանյութ էր հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Տեսանյութում երևում է, որ Մանվել Գրիգորյանին պատկանող հանգստյան գոտին վերածվել էր զինապահեստի, ռետրո և ժամանակակից տասնյակ ավտոմեքենաների ավտոպարկի: Ակնալճի ամառանոցը գեներալի համար ծառայել է նաև «զինվորի բաժին» նշագրումով սննդի, հիգիենիկ պարագաների, դեղորայքի, զինվորական հանդերձանքի պահեստարանի: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռևս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր…
Մանվել Գրիգորյանը ձերբակալված է։
