Գողությունն այլ բան է, հոգևոր սննդի գողությունն` այլ։ Այսօր լրագրողների հետ զրույցում, անդրադառնալով Մանվել Գրիգորյանի գործին, ասաց Պետական վերահսկողական ծառայության պետ Դավիթ Սանասարյանը։
«Պատերազմական վիճակում գտնվող պետությունների համար նման հանցագործություններն ուղղակիորեն դավաճանությանը հավասար բաներ են։ Պետությունից գողանելն, իհարկե, հանցագործություն է, բայց ՊՆ-ից գողանալը` բոլորովին այլ բան»,- ասաց նա` հավելելով, որ Մանվել Գրիգորյանն այդ ամենն արել է Սերժ Սարգսյանի թողտվությամբ։
Նրա խոսքով` Հայաստանում կոռուպցիա և ամենաթողություն կա բոլոր ոլորտներում, և Պետական վերահսկողական ծառայությունը խոստանում է բոլորը ջրի երես հանել։
Անդրադառնալով ՀՀ-ից փախչող նախկին իշխանավորների մասին լուրերին` Դավիթ Սանասարյանը պատասխանեց. «Ուր էլ փախչեն, անհասանելի կղզիներ չկան»։
Նշենք, որ ըստ մամուլում տարածված լուրերի` Հայաստանից ընտանիքով հեռացել է Սյունիքի նախկին մարզպետ Սուրիկ Խաչատրյանը։ Նա, ըստ այդ աղբյուրների, հատել է հայ-վրացական սահմանը և պատրաստվում է այնտեղից մեկնել ԱՄՆ։