ԵՐԵՎԱՆ, 13 հունիսի — Sputnik. Աշոտ Սաֆարյան. Հայաստանի վերջերս ձևավորված կառավարությունում առաջին տարաձայնություններն են ի հայտ եկել։ Պատճառներից մեկը դարձավ կուտակային կենսաթոշակային համակարգի պարտադիր բաղադրիչի ուժի մեջ մտնելը։
Հիշեցնենք` կառավարության որոշմամբ ` պարտադիր կուտակային համակարգը մնում է և ուժի մեջ է մտնում հուլիսի 1–ին, սակայն կուտակվող միջոցների հարաբերակցությունը փոխվում է. եթե հիմա աշխատող քաղաքացիների աշխատավարձից որպես կենսաթոշակային վճար պահվող 10 տոկոսի կեսը վճարում է աշխատողը, կեսը` պետությունը, ապա հուլիսի 1–ին հարաբերակցությունը կփոխվի ու կլինի 2,5% / 7,5%. բյուջեի բաժինը կավելանա։
Մանե Թանդիլյանը ի սկզբանե դեմ էր պարտադիր կենսաթոշակային համակարգին, ինչի մասին կրկին հայտարարեց հունիսի 11–ին կառավարության նիստում։ Այն ժամանակ փոքր վիճաբանություն եղավ Թանդիլյանի ու Փաշինյանի միջև։
Երեքշաբթի երեկոյան հայտնի դարձավ, որ այդ հարցի շուրջ սկզբունքային տարաձայնությունների պատճառով աշխատանքի և սոցիալական հարցերի նախարար Մանե Թանդիլյանը հրաժարական տվեց: Նա լքեց նաև «Լուսավոր Հայաստան» կուսակցությունը, որը (ինչպես և «Հանրապետություն» կուսակցությունը) «Ելք» դաշինքում է, որի կազմում է նաև Նիկոլ Փաշինյանի «Քաղաքացիական պայմանագիրը»։
Հատկանշական է, որ այս օրերին մամուլում ակտիվորեն լուրեր էին շրջանառվում քաղաքական դաշինքի ներսում եղած խմորումների մասին։ Նշվում էր, որ Փաշինյանի կուսակցությունն առանձին է մասնակցելու ԱԺ ընտրություններին, քանի որ վարչապետի ներկայիս վարկանիշը նրան թույլ է տալիս առանձնանալ երկու քաղաքական ուժերից ու սեփական խաղը վարել։ Փաշինյանի կուսակցության մեկուսացումն արդեն այսօր անդրադառնում է կառավարությունում ու խորհրդարանական խմբակցությունում կադրային փոփոխությունների վրա։ «Բարգավաճ Հայաստանում» դժգոհ են Փաշինյանի նշանակումներից։ Ասում են` կուսակցության առաջնորդ Էդմոն Մարուքյանն արդեն պատկերացրել է իրեն «Ելք» խորհրդարանական դաշինքի ղեկավարի դերում, սակայն Փաշինյանը չի ցանկանում նրան այդ պաշտոնում տեսնել ու կարծում է, որ այդ խմբակցությունը պետք է գլխավորի «Քաղաքացիական» պայմանագրի ներկայացուցիչը։ Այդ ֆոնին` Մանե Թանդիլյանի հեռանալը նախարարի պաշտոնից ու կուսակցությունից էլ ավելի է կրակին յուղ լցնում։
Փաշինյանի թիմի ներկայիս գզվռտոցը լրիվ նախընտրական քարոզարշավի տրամաբանության մեջ է։ Այդ քարոզարշավին ակտիվորեն սկսել են մասնակցել նաև «Ծառուկյան» ու «Դաշնակցություն» դաշինքները, որոնք Փաշինյանի կառավարությունում պորտֆելներ ունեն։
Այս երկու ուժերն էլ զերծ չեն ներթիմային վեճերից։ Տնտեսական զարգացման և ներդրումների նախարարը, դաշնակցական Արծվիկ Մինասյանը, ինչպես Թանդիլյանը, դեմ էր կուտակային համակարգին, թեև նա չի ցանկանում լքել կառավարությունը։ Իսկ «Ծառուկյան» դաշինքի դժգոհությունն էր առաջացրել կառավարության «Բարեգործության մասին» օրինագիծը։ Պատգամավորները կարծում են, որ տվյալ օրինագիծն ուղղված է իրենց ղեկավարի` խոշոր գործարար Գագիկ Ծառուկյանի դեմ, որը Հայաստանում մի շարք խոշոր բարեգործական նախագծեր է իրականացնում։ Փաստաթուղթը, մասնավորապես, իջեցնում է «բարեգործություն» եզրույթի նշաձողը. ըստ էության` ենթադրվում է, որ Ծառուկյանի ձեռնարկություններն ու ընկերությունները և հարկային դաշտ են բերվելու։ Ծառուկյանի կողմնակիցները դժգոհ են դրանից:
Առաջին հայացքից կարելի է ենթադրել, որ Փաշինյանի` արագորեն ձևավորված, ըստ էության` ժամանակավոր կառավարությունն առաջին ճեղքերն է տալիս, ցուցադրելով, որ անկայուն է բազմաթիվ տնտեսական մարտահրավերների առաջ, որոնց հետ նա բախվում է։ Մյուս կողմից էլ` ներկայիս վիճաբանությունները լրիվ ընդունելի են, հաշվի առնելով որոշումների կայացման թափանցիկությունն ու բազմակարծության առկայությունը։ Իսկ հաշվի առնելով, որ խորհրդարանական ընտրությունները, որտեղ յուրաքանչյուր կուսակցություն պաշտպանելու է իր սեփական օրակարգն ու խնդիրները, ապա այդ հակասությունները դեռ աճելու են։
