ԵՐԵՎԱՆ, 13 հունիսի — Sputnik. «Լուսավոր Հայաստան» կուսակցությունը կպահպանի նախարարի տեղը կառավարությունում։ Այս մասին լրագրողներին հայտնեց կուսակցության ղեկավար, «Ելք» դաշինքի պատգամավոր Էդմոն Մարուքյանը։
Մանե Թանդիլյանի հրաժարականից հետո կուսակցությունը նոր թեկնածու կառաջադրի այդ պաշտոնում։
«Ավելի շուտ ոչ թե երբ, այլ եթե նա գնա, քանի որ պաշտոնական դիմում նա դեռ չի ներկայացրել», — հայտնեց Մարուքյանը։
Թանդիլյանը պարտադիր կուտակային կենսաթոշակային համակարգին դեմ հանդես եկող առաջին ակտիվիստներից մեկն էր։ Երբ կառավարությունը որոշեց շարունակել այն (թեև կրճատելով քաղաքացիների վճարումները), Թանդիլյանը հայտարարեց իր հրաժարականի մասին։
Սրա վերաբերյալ Մարուքյանը նկատեց, որ «Ելք» դաշինքը նախընտրական ծրագրում պահանջում էր չեղարկել կուտակային կենսաթոշակները։ Իսկ դաշինքի անդամ էր նաև Նիկոլ Փաշինյանը, որն այժմ հայտարարում է, թե ժամանակները փոխվել են, և համակարգը պետք է գոնե որոշ ժամանակով պահպանել։
Այո, բայց իշխանության է եկել միայն Փաշինյանը, այլ ոչ ամբողջ «Ելքը», ընդգծեց Մարուքյանը։
«Այդ պատճառով պետք չէ ինձ հարցնել, թե ինչու ներկայիս կառավարությունը չի կատարում «Ելք» դաշինքի ծրագիրը։ «Ելքը» որպես այդպիսին իշխանության չի եկել, թեև մենք մասնակցում ենք կառավարության աշխատանքին», — հայտնեց Մարուքյանը։
Նա ավելացրեց, որ իրավիճակն այդքան էլ սովորական չէ, բայց այն անսովոր ժամանակ էլ ձևավորվել է` իշխանափոխությունից հետո։
Մարուքյանի խոսքով` «Լուսավոր Հայաստանը» կառավարության շրջանակում կշարունակի կենսաթոշակային բարեփոխումներին ուղղված քննարկումները։
