ԵՐԵՎԱՆ, 12 հունիսի — Sputnik. Դիմահարդար Գոհար Ավետիսյանը իրականացրել է Նովոսիբիրսկում բնակվող Իննայի երազանքը։ Նրա դեմքի մեծ մասը պատված է հեմանգիոմայով։
«Երբ Իննան իր լուսանկարն ուղարկեց ինձ և խնդրեց իրականացնել իր երազանքը` երջանիկ դարձնել գոնե մեկ օրով, ես անմիջապես սկսեցի մտածել, թե ինչ կարող եմ անել դիմահարդարման միջոցով… լուսանկարը ցույց տվեցի թիմիս, և բոլորը պարզապես թոթվեցին ուսերը… նրանք ինձ հարցրին` համոզվա՞ծ ես, որ կկարողանաս օգնել նրան», — տեսանյութին կից գրել է Ավետիսյանը։
Դիմահարդարման վարպետը նշել է, որ սա իր ամենածանր աշխատանքներից մեկն է եղել։
«Ես կազմակերպեցի նրա ժամանումը Նովոսիբիրսկից Մոսկվա և հակառակ ուղղությամբ. նա ինձ հետ մի ամբողջ օր անցկացրեց, նա իր հետ տարավ այն զգեստը, որը հատուկ նրա համար էի ընտրել և նվիրել` որպես այս օրվա և մեր հանդիպման հիշատակ։ Իննան 30 տարեկան է, երբեք ընտրյալ չի ունեցել, շատ ուրախ էր, երբ իրեն տեսավ հայելու մեջ», — գրել է Ավետիսյանը։
Դիմահարդարման վարպետը նույնիսկ չէր էլ պատկերացնում, որ իր երկրպագուներն այդքան բուռն կարձագանքեն ու կաջակցեն Իննային (Ավետիսյանի երկրպագուների բանակը գերազանցում է 5 միլիոնը):
«Ես պարզապես ցնցված եմ… խոսքեր չունեմ… լալիս եմ… չէի սպասում, որ այսքան մարդ կարձագանքի Իննայի պատմությանը և կցանկանա օգնել նրան։ Խոսքեր չեմ գտնի պատմելու այն մասին, թե ինչ եմ զգում հիմա և որքան շնորհակալ եմ ձեզ», — արցունք աչքերին պատմել է դիմահարդարման վարպետը։
Ավետիսյանը վստահեցրել է բաժանորդներին, որ հենց իրենք են աշխարհում ամենալավն ու բարին, քանի որ միշտ պատրաստ են օգնության գալ։ Հայուհին Իննային աջակցելու համար նաև դրամահավաք է կազմակերպել, առաջիկայում Գոհարն անձամբ կզբաղվի նրա վիրահատություն հարցով։
Գոհարն ինքնուրույն է հասել հաջողության, նա ինքնուս դիմահարդար է: Այս ոլորտում առաջին փորձերը կատարել է 11-12 տարեկանում: 16 տարեկանում ընդունվել է Ժողտնտեսության և պետական ծառայության ռուսական ակադեմիայի տնտեսագիտական ֆակուլտետ:
Արդեն առաջին կուրսում սկսել է դիմահարդարել բոլոր ընկերուհիներին և ծանոթներին: Հետաքրքրությունը դարձել է աշխատանք, և նա թողել է ուսումը: 2012թ-ին սկսել է դասախոսել, դիմահարդարման վարպետության դասեր է անցկացրել, իսկ հիմա նա Մոսկվայի կենտրոնում սեփական դպրոց և ստուդիա ունի:
