ԵՐԵՎԱՆ, 8 հունիսի — Sputnik, Լաուրա Սարգսյան. Թանդոյանց Սուրբ Աստվածածին եկեղեցու` հայ առաքելական, թե վրացական ուղղափառ եկեղեցուն պատկանելու գործով լսումները կրկին հետաձգվեցին։ Այս անգամ դատավորը պետք է շտապ հեռանար քաղաքից։
Այս մասին Sputnik Արմենիայի թղթակցի հետ զրույցում ասաց Վրաստանում հանդուրժողականության և բազմազանության ինստիտուտի (TDI) փաստաբան Գվանցա Լոմիան։
Ի սկզբանե Թանդոյանց եկեղեցու գործով լսումները պետք է կայանային մայիսի 1-ին, հետո այն տեղափոխվեց հունիսի 7-ին։ Սակայն երեկ այն նույնպես տեղի չունեցավ։
«Այս գործով լսումները տեղափոխվել են հունիսի 14-ին։ Դատավորը քաղաքում չէր, նա պետք շտապ հեռանար։ Երեկ մեզ այսպես ասացին դատարանում», — պարզաբանեց Լոմիան։
Նա ընդգծեց` դա չի խանգարում հավատալ, որ դատարանն անաչառ կլինի, արդարությունը կհաղթի, ու Թանդոյանց եկեղեցին կփոխանցվի իր օրինական տիրոջը` Հայ առաքելական եկեղեցուն։
«Մենք դատարանում կներկայացնենք մեր ունեցած բոլոր ապացույցները։ Չի կարելի թույլ տալ, որ տաճարի տարածքում այլ դավանանքի եկեղեցի կառուցվի», — ասաց Լոմաին։
Լոմիան ընդգծեց, որ Թանդոյանցը վրացական ուղղափառ եկեղեցու տեղում չի կառուցվել, ինչպես պնդում է վրացական պատրիարքարանը։ Նա հավելեց, որ նրանց փաստարկները լիովին հաստատում են հայկական կողմի իրավացիությունը։
«Այն եկեղեցին, որի մասին խոսում է վրացական պատրիարքարանը, լրիվ այլ վայրում է գտնվում։ Թանդոյանց եկեղեցին փայտյա վանքի տեղում է կառուցվել», — ասաց փաստաբանը։
Ավելի վաղ վրացական Պատրիարքարանը հայտարարել էր, թե Թանդոյանցի տեղում ուղղափառ եկեղեցի է եղել։ Որպես ապացույց նրանք ներկայացնում են վրացերեն գրություններով տապանաքարերը։ Հայ առաքելական եկեղեցին արդեն հերքել է դա` նշելով, որ XVIII դարում Թանդոյանց եկեղեցու տեղում գերեզմանատուն է եղել, իսկ այն ժամանակ գերեզմանատները հայկականի ու վրացականի չէին տարանջատում։
Լոմիան հույս ունի, որ դատարանը արդար վճիռ կկայացնի։
Թանդոյանցի դատական գործով հայցվորը Հայ առաքելական եկեղեցին է, պատասխանող կողմը` Վրաստանի պետական ռեեստրում գրանցումներ իրականացնող մարմինը։ Հայկական եկեղեցին դատարանում ներկայացնում են Հանդուրժողականության և բազմազանության ինստիտուտի (TDI) ու մարդու իրավունքների և մոնիթորինգի ուսումնասիրության կենտրոնի (EMC) իրավաբանները։ 4591 քմ մակերեսով տարածքը` մշակութային հուշարձանով, վրացական պատրիարքարանին է հանձնվել 2017թ.-ի հուլիսի 26-ին։
Թանդոյանց Սուրբ Աստվածածին եկեղեցին կառուցվել է 1866 թվականին։ Մինչև ԽՍՀՄ կազմավորումը Թանդոյանցը պատկանել է Հայ առաքելական եկեղեցուն։ 1927թ.-ի օգոստոսի 12-ից եկեղեցու շենքն օգտագործել են հասարակական նպատակներով։ ԽՍՀՄ-ի փլուզումից հետո եկեղեցին անցել է պետության տնօրինությանը։ Երկար տարիներ Հայ առաքելական եկեղեցին խնդրել է Թանդոյանց եկեղեցին մյուս հայկական եկեղեցիների հետ վերադարձնել իր օրինական տերերին, բայց ապարդյուն։
