ԵՐԵՎԱՆ, 7 հունիսի — Sputnik. ՀՀԿ-ից հեռացած գործարար պատգամավորներին ԱԺ փոխնախագահ Էդուարդ Շարմազանովը հարգանքով է վերաբերվում: Այս մասին նա այսօր ասաց ԱԺ-ում, լրագրողների հետ զրույցում՝ չմեկնաբանելով, թե արդյո՞ք վերջինները շահ ունեին, երբ անդամակցել էին իշխող քաղաքական ուժի խորհրդարանական խմբակցությանը:
Ինչ վերաբերում նախանշվող ԱԺ արտահերթ ընտրություններին, Էդուարդ Շարմազանովը ասաց, որ որպես քաղաքական կուսակցություն ՀՀԿ-ն մասնակցելու է դրանց և կարծում է, որ դրանց արդյունքում դարձյալ մեծ ներկայացվածություն կունենա խորհրդարանում:
Իսկ ԱԺ փոխնախագահի պաշտոնը կորցնելու հեռանկարը չի վախեցնում Շարմազանովին: «Եթե իրենք կորոշեն, որ ես չպիտի լինեմ ԱԺ փոխնախագահ, աշխարհը շուռ չի գա, ես չեմ լինի: Ինձ ընտրել են պատգամավորները, այս անգամ էլ որոշողները պատգամավորներն են»,- նշեց նա։
Էդուարդ Շարմազանովը տեղեկացրեց նաև, որ ՀՀԿ-ն որոշել է՝ ընտրական օրենսգրքի փոփոխությունների նախագծի աշխատանքային խմբում ՀՀԿ-ից ներկայացված են լինելու Դավիթ Հարությունյանը, Արփինե Հովհաննիսյանն ու Վիգեն Սարգսյանը:
