ԵՐԵՎԱՆ, 7 հունիսի — Sputnik. ՀՀ զինված ուժերը զինված ուժերը դուրս են մնալու ցանկացած քաղաքական գործընթացից։ Այս մասին լրագրողներին ԱԺ-ում ասաց պաշտպանության նախարար Դավիթ Տոնոյանը։
«Նոր կառավարության ծրագիրն անվերապահորեն իրականացվելու է. իսկ զինված ուժերը քաղաքական ցանկացած գործընթացից դուրս են լինելու», —նշեց նա։
Հարցին՝ նախկինում զինված ուժերը քաղաքական գործընթացներում ներգրավված եղե՞լ են, նախարարը պատասխանեց. «Եթե հիմա այդ հարցը բարձրացվում է, ըստ երևույթին, ինչ-որ խնդիրներ եղել են: Եղել են դեպքեր, երբ լրագրողներն են արձանագրել ինչ-որ խախտումներ, միշտ խնդիրներ եղել են, մենք արձագանքել ենք: Բայց ես՝ որպես պաշտպանության նախարար, աշխատելու եմ, որ այդ ամենը չկրկնվի»:
Ավելի վաղ Տոնոյանը ԶԼՄ-ներին հայտնել էր, որ իր որդին այս ամռանը ծառայության է մեկնելու և հորդորել էր հետևել խոշորացույցով։
