ԵՐԵՎԱՆ, 7 հունիսի — Sputnik. Պետք է բացառել գումարի դիմաց բանակում ծառայությունից խուսափելու հնարավորությունը։ Այս մասին այսօր ԱԺ–ում լրագրողներին ասաց պաշտպանության նախարար Դավիթ Տոնոյանը։
Նրա խոսքով` ներկայիս օրենքը (2003 թվականից գործող), որի համաձայն ծառայություն չանցածները կարող են վերադառնալ Հայաստան և, որոշակի գումարի դիմաց չծառայել, դեռ գործում է։ Սակայն ինչ-որ պահի այն պետք է դադարեցնել։
Միևնույն ժամանակ, նրանք, ովքեր կցանկանան ծառայելու համար վերադառնալ, կկարողանան օդանավակայանում հայտնել իրենց վերադարձի նպատակը, համապատասխան երաշխիքներ ներկայացնել, ներկայանալ զինկոմիսարիատ և ազատվել քրեական հետապնդումից։
Հիշեցնենք` «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքը գործում է 2003 թվականից։ Արտերկիր մեկնած և մինչև 27 տարեկանը ծառայության համար երկիր չվերադարձած քաղաքացիները, պետք է 200 հազարական դրամ վճարեն յուրաքանչյուր բաց թողած զորակոչի համար (3.6 մլն դրամ, կամ մոտ 7.5 հազար դոլար – խմբ.)։ Օրենքում կատարած փոփոխությունների համաձայն` բանակում չծառայած քաղաքացիները կկարողանան Հայաստան վերադառնալ մինչև 2019 թվականի վերջը։
