ԵՐԵՎԱՆ, 4 հունիսի — Sputnik. Ջերմուկցիներն այսօր առավոտից դարձյալ փակել են դեպի Ամուլսարի ոսկու հանքավայր բարձրացող դաշտամիջյան ճանապարհները։ Այս մասին իր ֆեյսբուքյան էջում հայտնում է «Ջերմուկի զարգացման կենտրոն» ՀԿ-ի նախագահ Վազգեն Գալստյանը:
«Քանի որ պլանավորվել է երկարատև պայքար հանքի աշխատանքների վերջնական դադարեցման համար, ուստի որդեգրվել է հերթափոխով և արագ մոբիլիզացիոն տակտիկան։ Այսինքն՝ ճանապարհը փակում ենք հստակ գրաֆիկով, բայց անհրաժեշտության դեպքում 15-20 րոպեի ընթացքում դառնում ենք մինչև 300 մարդ, խիստ անհրաժեշտության դեպքում ոտքի է կանգնում Գնդեվազի ողջ բնակչությունը»,-գրել է Գալստյանը:
Բողոքի ակցիայի մասնակիցները (հիմնականում` Գնդեվազ գյուղի բնակիչները) հայտարարում են, որ հանքշահագործող « Լիդիան Արմենիա» ընկերությունը վերջին մի քանի ամսվա ընթացքում Ամուլսարում հորատման աշխատանքների ժամանակ 2 անգամ վնասել է իրենց գյուղի խմելու ջրի խողովակները։ Տեղացիներն ահազանգում են նաև, որ անձրևների ժամանակ ծորակներից մուգ դարչնագույն հեղուկ է հոսում, իսկ չոր եղանակին իրենք խեղդվում են հանքի տարածքից գյուղ հասնող փոշուց։ Գյուղի կյանքը խաթարում են նաև պարբերական պայթեցումները։
Իսկ ամենամեծ վտանգը տեղի բնակիչները համարում են հանքի շահագործման ընթացքում կիրառվելիք ցիանիդն ու աղաթթուն, որոնք թունավորելու են Ջերմուկի բնությունն ու գյուղացիների բերքը։
Բողոքողները պահանջում են դադարեցնել հանքի աշխատանքները և վերանայել հանքշահագործման թույլտվությունը։
Հիշեցնենք, որ հանքի շահագործման դեմ պայքարող ակտիվիստները մայիսի 23-ին Երևանում բողոքի ակցիա էին կազմակերպել, որի ընթացքում իրենց բողոք- նամակը հանձնեցին ՀՀ նախագահ Արմեն Սարգսյանին։
Նա ցուցարարներից վերցրեց Ամուլսարի հանքի վերաբերյալ նամակը և խոստացավ ուսումնասիրել ներկայացված փաստերը։
