ԵՐԵՎԱՆ, 2 հունիսի — Sputnik. Ծառայողական ավտոմեքենաների քանակի կրճատման արդյունքում պետական բյուջեում տնտեսումն էական չի լինի։ Sptunik Արմենիայի հետ զրույցում այս մասին ասաց ՀՀ ֆինանսների նախարար Ատոմ Ջանջուղազյանը։
«Որովհետև տնտեսման չափերը շատ մեծ չեն։ Ծառայողական յուրաքանչյուր ավտոմեքենայի համար բյուջեում նախատեսված է 1.2 մլն դրամ տարեկան սպասարկման և շահագործման գումար։ Սա, հավատացեք, որ շատ մեծ չէ»,- ասաց նախարարը։
Ֆինանսների նախարարի խոսքով` պետական ապարատի ծառայողական ավտոմեքենաների ընդհանուր քանակը 915 է, հետևաբար դրանց սպասարկման ու շահագործման համար այս տարվա բյուջեում հատկացվել է 1 մլրդ 98 մլն դրամ։
Թե քանի ավտոմեքենա է արդեն դուրս բերվել շահագործումից, Ատոմ Ջանջուղազյանը չասաց, նշեց միայն, որ այդ մասին հրապարակային հայտարարություններ են արվել։
ՀՀ առաջին փոխվարչապետ Արարատ Միրզոյանը կառավարության մայիսի 17 —ի նիստում ծառայողական ավտոմեքենաներից հրաժարվելու հայտարարություն էր արել` նշելով, որ պետական ապարատում կա ծառայողական մեքենաների գերկուտակում, ինչը բյուջետային միջոցների վատնում է, ուստի ինքը հրաժարվում է իր գրասենյակին հատկացված 5 մեքենայից 3-ից։ Նույն նիստում փոխվարչապետ Տիգրան Ավինյանը հայտնել էր, որ հրաժարվել է իր գրասենյակի համար նախատեսված չորս մեքենաներից երկուսից:
Այս 5 մեքենաների խնայողությունը, ըստ ֆինանսների նախարարի ներկայացրած ծախսերի, տարեկան 6 մլն դրամ է։
Ծառայողական ավտոմեքենաների կրճատման մասին հունիսի 1-ին խոսել էր նաև կառավարության աշխատակազմի ղեկավար Էդուարդ Աղաջանյանը` ասելով, որ կառավարության աշխատակազմում ավտոմեքենաները կարելի է կրճատել առնվազն մեկ երրորդով։ Կառավարության աշխատակազմն այս պահին 110 ավտոմեքենա ունի, առաջարկված կրճատումների արդյունքում շուրջ 33 ավտոմեքենա կպակասի։ Այս կրճատման արդյունքում պետական բյուջեն ևս 39 600 000 դրամի խնայողություն կունենա։
Ու թեև երիտասարդ պաշտոնյաները վստահեցնում են, որ ծառայողական ավտոմեքենաների կրճատման արդյունքում պետական բյուջեն կշահի, բայց կառավարության ավելի փորձառու անդամ ֆինանսների նախարարը վստահեցնում է, որ սպասվող խնայողությունը, անկախ կրճատված ավտոմեքենաների քանակից, մեծ չի լինի։
Ատոմ Ջանջուղազյանի խոսքով` բյուջեի ծախսային մասի վրա դա էական ու նկատելի ազդեցություն ունենալ չի կարող, որովհետև ընդհանուր հաշվեկշռում այդ գումարն այսօր էլ էական չէ։
